കോഴിക്കോട് : പുരാവസ്തു തട്ടിപ്പ് കേസില് അറസ്റ്റിലായ മോന്സണ് മാവുങ്കലിനെക്കുറിച്ച് ഐജി ലക്ഷ്മണയും അനിത പുല്ലയിലും നടത്തിയ ചാറ്റ് പുറത്ത്. കേസില് മോന്സണ് മാവുങ്കല് അറസ്റ്റിലായ കാര്യം ഐജി ലക്ഷ്മണയെ അറിയിച്ചത് അനിത പുല്ലയിലാണെന്നാണ് ചാറ്റ് വ്യക്തമാക്കുന്നത്. മോന്സണെക്കുറിച്ച് മുന് പോലീസ് മേധാവി ലോക്നാഥ് ബെഹ്റ രണ്ട് വര്ഷം മുമ്പ് സംശയം പ്രകടിപ്പിച്ചിരുന്നുവെന്ന് അനിത ലക്ഷ്മണയോട് പറയുന്നു.
പുരാവസ്തു തട്ടിപ്പ് കേസില് മോന്സണ് മാവുങ്കല് അറസ്റ്റിലായതിന് പിന്നാലെ സെപ്റ്റംബര് 25ന് രാത്രി 9.30 ശേഷം നടന്നിട്ടുള്ള വാട്സ്ആപ്പ് ചാറ്റാണ് ഇപ്പോള് പുറത്തുവന്നിരിക്കുന്നത്. ഇന്ന് വൈകുന്നേരം മോന്സ് അറസ്റ്റിലായി എന്ന് അനിത പുല്ലയില് ലക്ഷ്മണയോട് പറയുന്നു. ഇതിന് ലക്ഷ്മണ നല്കിയ മറുപടി ഡിലീറ്റ് ചെയ്ത നിലയിലാണ്. മോന്സണ് എന്തുതരം ഇടപാടാണെന്ന് രണ്ട് വര്ഷം മുമ്പ് ബെഹ്റ ചോദിച്ചിരുന്നുവെന്നും അവര് പറയുന്നു.
നേരത്തെ വിദേശത്തുള്ള അനിത പുല്ലയിലിനെ നാട്ടിലേക്ക് വിളിപ്പിച്ച് ചോദ്യം ചെയ്യാന് ക്രൈം ബ്രാഞ്ച് ആലോചിക്കുന്നുവെന്ന് റിപ്പോര്ട്ടുകളുണ്ടായിരുന്നു. മോന്സണ് മാവുങ്കലുമായി ബന്ധപ്പെട്ട കൂടുതല് വിവരങ്ങള് അനിത പുല്ലയിലിന് അറിയാമെന്ന വിലയിരുത്തലിലാണ് ക്രൈം ബ്രാഞ്ചിന്റെ നീക്കം. പല ഉന്നതരേയും മോന്സണ് പരിചയപ്പെടുത്തിയത് അനിതയായിരുന്നു. ലോക്നാഥ് ബെഹ്റയെ മോന്സണ് നടത്തുന്ന മ്യൂസിയത്തിലെത്തിച്ചത് അനിതയായിരുന്നു. തട്ടിപ്പ് കേസില് പരാതിക്കാരെ അനിത സഹായിച്ചിരുന്നു.
