ഏറെക്കാലത്തെ കാത്തിരിപ്പിനൊടുവിൽ ഡാർക്ക് മോഡ് അവതരിപ്പിച്ച ഫേസ്ബുക്കിന്റെ ഉടമസ്ഥതയിലുള്ള വാട്സാപ്പ് തങ്ങളുടെ യൂസേഴ്സിനായി പുതിയൊരു ഫീച്ചർ അവതരിപ്പിക്കാനിരിക്കുകയാണ്. ഒരു നിശ്ചിത സമയത്തിന് ശേഷം വാട്സാപ്പിൽ അയച്ച മെസേജുകൾ ഓട്ടോമാറ്റിക്കായി ഡിലീറ്റ് ആവുന്ന “ഡിലീറ്റ് മെസേജസ്” ഫീച്ചർ ആണ് കമ്പനി അവതരിപ്പിക്കുന്നത്. കഴിഞ്ഞ വർഷം വാട്സാപ്പിന്റെ ഐഒഎസ് ബീറ്റാ അപ്ഡേറ്റിലാണ് ഈ ഫീച്ചർ ആദ്യമായി കമ്പനി പുറത്തിറക്കിയത്. ഇപ്പോൾ ആൻഡ്രോയിഡിന്റെ ബീറ്റാ അപ്ഡേറ്റിലാണ് ഡിലീറ്റ് മെസേജസ് ഫീച്ചർ കണ്ടെത്തിയിരിക്കുന്നത്.
2.20.83, 2.20.84 എന്നിങ്ങനെയുള്ള രണ്ട് ആൻഡ്രോയിഡ് ബീറ്റാ വേർഷനുകളിലാണ് തനിയെ മെസേജുകൾ ഡിലീറ്റാവുന്ന ഫീച്ചർ വാട്സാപ്പ് അവതരിപ്പിച്ചിരിക്കുന്നത്. എത്ര സമയം കഴിഞ്ഞാണ് മെസേജുകൾ ഡിലീറ്റ് ആവേണ്ടതെന്ന് യൂസറിന് തീരുമാനിക്കാനാവും. ഒരു മണിക്കൂർ, ഒരു ദിവസം, ഒരു ആഴ്ച, ഒരു മാസം, ഒരു വർഷം എന്നിങ്ങനെ എത്ര സമയപരിധി കഴിഞ്ഞാണ് മെസേജുകൾ ഡിലീറ്റ് ചെയ്യേണ്ടതെന്ന് യൂസറിന് സെറ്റ് ചെയ്യാം. വാബീറ്റാ ഇൻഫോയുടെ റിപ്പോർട്ട് അനുസരിച്ച് ഈ ഫീച്ചർ ഡിഫോൾട്ടായി ഡിസേബിൾ ചെയ്തിരിക്കുകയാണ്. നിലവിൽ യൂസറിന് ഈ ഫീച്ചർ ഉപയോഗിക്കാനാവില്ല.
എപ്പോഴാണ് ഈ മെസേജ് ഡിലീറ്റ് ചെയ്യാനുള്ള ഓപ്ഷൻ എല്ലാവർക്കും ലഭിക്കുക എന്ന കാര്യം കമ്പനി അറിയിച്ചിട്ടില്ല. ഡെവലപ്പർ ടീം ഇതിനായി പ്രവർത്തിച്ചു വരികയാണ് എന്നാണ് അറിയാൻ കഴിയുന്നത്. റിപ്പോർട്ടുകൾ അനുസരിച്ച് ഈ ഫീച്ചർ ആദ്യം ഗ്രൂപ്പ് ചാറ്റുകൾക്ക് മാത്രമേ ലഭ്യമാവുകയുള്ളൂ. ഗ്രൂപ്പ് അഡ്മിന്മാർക്ക് മാത്രം ഇത് എനേബിൾ ചെയ്യാനാവും. പിന്നീടാണ് വ്യക്തിഗത ചാറ്റുകളിലും ഈ ഫീച്ചർ അവതരിപ്പിക്കുക.
യൂസർ ഫീച്ചർ എനേബിൾ ചെയ്തുകഴിഞ്ഞാൽ ഒരു ക്ലോക്ക് ഐക്കൺ ആപ്ലിക്കേഷനിൽ കാണാനാവും. മെസേജ് എപ്പോഴാണ് ഡിലീറ്റ് ആവുക എന്ന് ട്രാക്ക് ചെയ്യാൻ ഈ ഐക്കൺ സഹായിക്കും. ഈ സൗകര്യം നിലവില് വന്നാല് ഇതിനായി പ്രത്യേകം ടോഗിള് ബട്ടന് വാട്സാപ്പിലുണ്ടാവും. വ്യക്തിഗത ചാറ്റുകളും ഗ്രൂപ്പ് ചാറ്റുകളും ക്ലീൻ ചെയ്യാനുള്ള ഒരു ടൂൾ പോലെ ഈ ഡിലീറ്റ് മെസേജസ് ഫീച്ചർ പ്രവർത്തിക്കും എന്നാണ് കരുതുന്നത്. ഒരു സമയപരിധിയ്ക്ക് ശേഷം മെസേജുകൾ ഡിലീറ്റ് ആവുന്നതുകൊണ്ടുതന്നെ മൊബൈൽ ഫോണുകളിൽ കൂടുതൽ സ്റ്റോറേജ് സ്പേസ് സേവ് ചെയ്യാൻ യൂസറിന് കഴിയും.
