ഇടുക്കി: ഇടുക്കി ചിന്നക്കനാലില് വീണ്ടും കാട്ടാനയുടെ ആക്രമണം. സിങ്കുകണ്ടത്ത് അന്തോണി രാജ് എന്നയാളുടെ ഷെഡ് തകർത്തു. ആളപായമില്ല. കഴിഞ്ഞ കുറച്ചു ദിവസങ്ങളായി അന്തോണി രാജും കുടുംബവും നാട്ടിലുണ്ടായിരുന്നില്ല. വിജനമായ പ്രദേശത്താണ് ഷെഡ് നിന്നിരുന്നത്. അതുകൊണ്ടു തന്നെ ആനക്കൂട്ടമാണോ, ഒറ്റയാനാണോ ആക്രമിച്ചതെന്നത് വ്യക്തമല്ല.
അരിക്കൊമ്പനെ കാടു കടത്തിയശേഷവും പ്രദേശത്ത് കാട്ടാന ആക്രമണം തുടരുകയാണ്. ചക്കക്കൊമ്പനല്ല ആക്രമണത്തന് പിന്നിലെന്ന് വനംവകുപ്പ് വ്യക്തമാക്കി. ഇവിടെ നിന്നും നാലു കിലോമീറ്റര് അകലെയാണ് ഇന്നലെ രാത്രി ചക്കക്കൊമ്പനെ കണ്ടതെന്നും ഇന്നു രാവിലെയും ചക്കക്കൊമ്പന് അവിടെ ഉള്ളതായി വിവരം ലഭിച്ചതായും വനംവകുപ്പ് ഉദ്യോഗസ്ഥര് സൂചിപ്പിച്ചു.
