തിരുവനന്തപുരം : യുഡിഎഫ് സർക്കാർ പിഎം ശ്രീ പദ്ധതിയിൽ ഒപ്പിടാൻ നീക്കം നടത്തിയാൽ അതിനെ നിശിതമായി എതിർക്കുമെന്ന് സിപിഐ നേതാവ് ബിനോയ് വിശ്വം അറിയിച്ചു. പിഎം ശ്രീ എന്നത് ദേശീയ വിദ്യാഭ്യാസ നയത്തിന്റെ ഭാഗമാണെന്നും, ഇത് യഥാർത്ഥത്തിൽ ആർഎസ്എസിന്റെ വിദ്യാഭ്യാസ അജണ്ടയാണെന്നുമാണ് അദ്ദേഹത്തിന്റെ ആരോപണം. വിദ്യാഭ്യാസ മേഖലയിലെ ഇത്തരം മാറ്റങ്ങൾ കേരളത്തോട് പറയുന്ന തെറ്റായ ഉത്തരമായിരിക്കുമെന്നും കമ്മ്യൂണിസ്റ്റ് പാർട്ടി ഇതിനെതിരെ ശക്തമായ നിലപാട് സ്വീകരിക്കുമെന്നും അദ്ദേഹം വ്യക്തമാക്കി.
വന്ദേമാതരം ചൊല്ലുന്നതുമായി ബന്ധപ്പെട്ട വിവാദങ്ങളിലും ബിനോയ് വിശ്വം തന്റെ നിലപാട് വ്യക്തമാക്കി. ഇന്ത്യയുടെ ദേശീയ വികാരത്തെയും പൈതൃകത്തെയും പാരമ്പര്യത്തെയും തെറ്റായ വഴിക്ക് വ്യാഖ്യാനിക്കുന്ന വരികൾ വന്ദേമാതരത്തിൽ ഉണ്ടെന്നും, അതുകൊണ്ടാണ് എല്ലാ വരികളും ചൊല്ലേണ്ടതില്ലെന്ന തീരുമാനം മുൻപുണ്ടായതെന്നും അദ്ദേഹം പറഞ്ഞു. ഗാന്ധിയും നെഹ്റുവും പഠിപ്പിച്ച മതനിരപേക്ഷത എന്ന അടിസ്ഥാന മൂല്യം കോൺഗ്രസ് മറന്നുപോയെന്നും അദ്ദേഹം വിമർശിച്ചു.
