കോട്ടയം : പോലീസിന്റെ ഔദ്യോഗിക വയര്ലെസ് സിഗ്നല് ചോരുന്നതായുള്ള സംശയത്തിന്റെ അടിസ്ഥനത്തില് മണിമല പൊന്തന്പുഴ വനമേഖലയോട് ചേര്ന്നുള്ള പ്രദേശങ്ങളില് വ്യാപക പരിശോധന. അടച്ചിട്ട വീടുകളും ഇടിഞ്ഞുപൊളിഞ്ഞ കെട്ടിടങ്ങളും വനമേഖലയും കേന്ദ്രീകരിച്ചായിരുന്നു പരിശോധന നടത്തിയത്. സിഗ്നലുകള് ചോരുന്നതായാണു പോലീസിന്റെ ടെലികോം വിഭാഗത്തിന്റെ വിലയിരുത്തല്.
സംശയം ശക്തമായതോടെയാണ് മണിമല പോലീസ്, പോലീസ് ടെലികോം വിഭാഗം എന്നിവരടങ്ങുന്ന സംഘം മേഖലയില് പരിശോധന ആരംഭിച്ചത്. വയര്ലെസ് സന്ദേശങ്ങള് ആരെങ്കിലും ചോര്ത്തുന്നുണ്ടോ എന്നാണു പോലീസിന്റെ സംശയം. 70 പേരടങ്ങുന്ന സംഘമാണ് പരിശോധനയില് പങ്കെടുത്തത്. വരും ദിവസങ്ങളിലും പരിശോധന തുടരും. വയര്ലെസ് സെറ്റുകളിലേതിനു സമാനമായ തരംഗ ദൈര്ഘ്യമുള്ള സന്ദേശങ്ങള് മറ്റെവിടെയെങ്കിലുമുള്ള ഇത്തരം ഉപകരണങ്ങളില് കയറി വരാമെന്ന് ടെലികോം വിദഗ്ധര് പറയുന്നു.