ചെന്നൈ: മുന് കാമുകനെ കൊന്ന് കഷ്ണങ്ങളാക്കി കുഴിച്ചിട്ട് യുവതി. ചെന്നൈയിലാണ് നാടിനെ നടുക്കിയ സംഭവം. ചെന്നൈ രാജ്യാന്തര വിമാനത്താവളത്തിലെ ഗ്രൗണ്ട് സ്റ്റാഫായ എം ജയന്തന് എന്നയാളെ മാര്ച്ച് മുതല് കാണുന്നില്ലെന്ന പരാതിയെത്തുടര്ന്ന് പോലീസ് നടത്തിയ അന്വേഷണത്തിലാണ് കൊലപാതകത്തിന്റെ ചുരുളഴിയുന്നത്. കേസില് മുപ്പത്തൊന്പതുകാരിയായ ഭാഗ്യലക്ഷ്മി അറസ്റ്റിലായി.
സഹോദരിക്കും കുടുംബത്തിനുമൊപ്പം താമസിച്ചിരുന്ന ജയന്തനെ മാര്ച്ച് 18 മുതല് കാണുന്നില്ലെന്ന് കാണിച്ച് സഹോദരിയാണ് പോലീസില് പരാതി നല്കിയത്. തുടര്ന്ന് നടത്തിയ അന്വേഷണത്തില് ജയന്തന് പ്രതിയായ ഭാഗ്യലക്ഷ്മിയെ കാണാന് പുതുക്കോട്ടയിലേക്ക് പോയതായി പോലീസ് കണ്ടെത്തിയതോടെ സംഭവത്തിന്റെ ചുരുളഴിഞ്ഞ് തുടങ്ങുകയായിരുന്നു. ചോദ്യം ചെയ്തതോടെ യുവതി കുറ്റം സമ്മതിക്കുകയായിരുന്നു. കഷ്ണങ്ങളാക്കിയ ശേഷം മൃതദേഹം ചെന്നൈയുടെ പ്രാന്തപ്രദേശത്ത് കുഴിച്ചിട്ടതായും ഭാഗ്യലക്ഷ്മി പോലീസിനോട് പറഞ്ഞു. ഭാഗ്യലക്ഷ്മി ഒറ്റയ്ക്കല്ല കുറ്റകൃത്യം നടത്തിയതെന്ന നിഗമനത്തിലാണ് പോലീസ്. സംഭവത്തില് കൂടുതല് അന്വേഷണം നടക്കുകയാണ്.
