കൊല്ലം : കൊല്ലത്തെ സ്വകാര്യ വനിതാ കോളജിൽ അതിക്രമിച്ചു കയറി വിദ്യാർഥിനിയെ കടന്നു പിടിച്ച യുവാവിനെ പോലീസ് കസ്റ്റഡിയിലെടുത്തു. കടപ്പാക്കട കൈരളി നഗർ13 ൽ കിരൺ (20) ആണ് ഈസ്റ്റ് പോലീസിന്റെ കസ്റ്റഡിയിലായത്. കിരണിന്റെ സുഹൃത്തായിരുന്ന കോളജ് വിദ്യാർഥിനി വീട്ടുകാരുടെ നിർദേശത്തെത്തുടർന്ന് സൗഹൃദം അവസാനിപ്പിച്ചിരുന്നു. ഇതിൽ പ്രകോപിതനായ കിരൺ കഴിഞ്ഞ ദിവസം കോളജിൽ നിന്നു പരീക്ഷ കഴിഞ്ഞിറങ്ങിയ വിദ്യാർഥിനിയെ ക്യാംപസിൽ അതിക്രമിച്ചു കയറി കടന്നു പിടിച്ചു.
ബലപ്രയോഗത്തിലൂടെ വലിച്ചിഴച്ചു കൊണ്ടു പോകാനും ശ്രമിച്ചു. സംഭവം കണ്ട് ഓടിയെത്തിയ വിദ്യാർഥിനികളും അധ്യാപകരും ചേർന്നാണ് വിദ്യാർഥിനിയെ രക്ഷപ്പെടുത്തിയത്. തുടർന്ന് ഒളിവിൽപോയ കിരണിനെ ഈസ്റ്റ് സിഐ ആർ.രതീഷിന്റെ നേതൃത്വത്തിൽ പോലീസ് കടപ്പാക്കടയിൽ നിന്ന് പിടികൂടുകയായിരുന്നു. കോടതിയിൽ ഹാജരാക്കി റിമാൻഡ് ചെയ്തു.
