കൊച്ചി : മെൻസ്ട്രൽ കപ്പ് ഉപയോഗം ജനകീയമാക്കാൻ ബോധവൽകരണം ആവശ്യമാണെന്ന് പ്രശസ്ത സ്ത്രീരോഗ വിദഗ്ധ ഡോ മായാദേവി എസ് കുറുപ്പ് പറഞ്ഞു. കേന്ദ്ര സമുദ്രമത്സ്യ ഗവേഷണ സ്ഥാപനത്തിൽ (സിഎംഎഫ്ആർഐ) നടന്ന ലോക വനിതാദിനാഘോഷ ചടങ്ങിൽ സംസാരിക്കുകയായിരുന്നു അവർ. മെൻസ്ട്രൽ കപ്പ് ധരിക്കാൻ കൂടുതൽ സ്ത്രീകൾ മുന്നോട്ട് വരുന്നതിലൂടെ ആർത്തവ ശുചിത്വ രംഗത്ത് വലിയ മുന്നേറ്റം സൃഷ്ടിക്കാനാകുമെന്നും അവർ പറഞ്ഞു. ഇവയുടെ ഉപയോഗം പ്രോത്സാഹിപ്പിക്കുന്നതിന്റെ ഭാഗമായി ബോധവൽകരണം നടത്തുമെന്ന് സിഎംഎഫ്ആർഐ ഡയറക്ടർ ഡോ.എ.ഗോപാലകൃഷ്ണൻ പറഞ്ഞു.
മത്സ്യമേഖലയിലെ സംരംഭകയായ അതിഥി അച്യുതിനെയും സിഎംഎഫ്ആർഐയിലെ കരാർ ജീവനക്കാരിയായ വി രമണിയെയും ചടങ്ങിൽ ആദരിച്ചു. സിഎംഎഫ്ആർഐ ഡയറക്ടർ ഡോ.എ.ഗോപാലകൃഷ്ണൻ അധ്യക്ഷത വഹിച്ചു. ഡോ.മിറിയം പോൾ ശ്രീറാം, ഡോ.സന്ധ്യ സുകുമാരൻ, ഡോ.ലിവി വിൽസൻ എന്നിവർ പ്രസംഗിച്ചു.
