കിഴക്കമ്പലം: താമരച്ചാലില് എസ്എന്ഡിപി ഗുരുമന്ദിരത്തിന് സമീപത്തെ അടച്ചിട്ട മരക്കമ്ബനി ഗോഡൗണില് വന് തീപിടിത്തം. വിവിധ സ്ഥലങ്ങളില്നിന്നു ശേഖരിച്ചിരുന്ന മര ഉരുപ്പടികളും മരത്തടി കൊണ്ട് നിര്മിച്ചുവച്ചിരുന്ന സാമഗ്രികളുമാണ് ഗോഡൗണിലുണ്ടായിരുന്നത്.ഇവ പൂര്ണമായും കത്തിനശിച്ചു. കിഴക്കമ്ബലം മുട്ടംതോട്ടില് ജോസിന്റെ ഉടമസ്ഥതയിലുള്ളതാണ് ഗോഡൗണ്. 15 ലക്ഷം രൂപയുടെ നഷ്ടം ഉണ്ടായതായി ഉടമ പറഞ്ഞു.പുലര്ച്ചെ അഞ്ചോടെ പ്രഭാത സവാരിക്കിറങ്ങിയവരാണ് സംഭവം ആദ്യം കാണുന്നത്. തീ ഉയരുന്നത് കണ്ടതിനെ തുടര്ന്ന് സമീപവാസികളെയും നാട്ടുകാരെയും വിവരമറിയിക്കുകയായിരുന്നു. ഇതിനിടെ ടിപ്പര് ഉള്പ്പെടെ രണ്ട് വാഹനങ്ങള് കമ്ബനിക്ക് സമീപത്തുനിന്നും നാട്ടുകാര് മാറ്റി.ആലുവ, പട്ടിമറ്റം അഗ്നിരക്ഷാ സേന യൂണിറ്റുകളെത്തിയാണ് തീയണച്ചത്. ഷോര്ട്ട് സര്ക്യൂട്ടാണ് അപകടത്തിന് കാരണമെന്നാണ് പ്രാഥമിക വിലയിരുത്തല്.
