ന്യൂയോര്ക്ക് : ലോകത്ത് കോവിഡ് ബാധിതരുടെ എണ്ണം 14 കോടി കടന്നു. 3,011,472 പേര് ഇതുവരെ മരണത്തിനു കീഴടങ്ങിയപ്പോള് 119,321,839 രോഗമുക്തി നേടുകയും ചെയ്തു. കഴിഞ്ഞ 24 മണിക്കൂറിനിടെ 827,870 പേര്ക്കാണ് ആഗോള വ്യാപകമായി കോവിഡ് ബാധിച്ചത്. ഇതേസമയത്ത് 12,485 പേര് രോഗം ബാധിച്ച് മരിച്ചു. 18,100,439 പേരാണ് നിലവില് രോഗം ബാധിച്ച് ചികിത്സയിലുള്ളത്. ഇതില് 107,020 പേരുടെ നില അതീവ ഗുരുതരമെന്നാണ് വിവരം. അമേരിക്ക, ഇന്ത്യ, ബ്രസീല്, ഫ്രാന്സ്, റഷ്യ, ബ്രിട്ടന്, തുര്ക്കി, ഇറ്റലി, സ്പെയിന്, ജര്മനി എന്നീ രാജ്യങ്ങളാണ് കോവിഡ് ബാധിതരുടെ എണ്ണത്തില് ആദ്യ പത്തിലുള്ളത്.
യുഎസില് മൂന്ന് കോടി ഇരുപത്തിമൂന്ന് ലക്ഷം പേര്ക്കാണ് ഇതുവരെ രോഗം സ്ഥിരീകരിച്ചത്. അരലക്ഷത്തിലധികം പുതിയ കേസുകള് റിപ്പോര്ട്ട് ചെയ്തു. മരണസംഖ്യ 5.79 ലക്ഷമായി ഉയര്ന്നു. പ്രതിദിന കൊവിഡ് കേസുകളില് ഇന്ത്യയാണ് ഇപ്പോള് ലോകത്ത് ഒന്നാം സ്ഥാനത്ത്. ഇന്നലെയും രണ്ട് ലക്ഷത്തിലധികം പേര്ക്കാണ് രാജ്യത്ത് രോഗം സ്ഥിരീകരിച്ചത്. 1185 പേരാണ് കഴിഞ്ഞ ദിവസം മരിച്ചത്. ഇതോടെ ആകെ മരണം 1,74,308 ആയി ഉയര്ന്നു.
