ദില്ലി: കേന്ദ്ര സര്ക്കാര് തങ്ങളോട് കാട്ടുന്ന കനത്ത നീതിനിഷേധത്തിനെതിരെ മെഡലുകള് ഗംഗയില് ഒഴുക്കി പ്രതിഷേധിക്കാന് ഗുസ്തി താരങ്ങള് ഹരിദ്വാറിലെത്തി. വിനേഷ് ഫോഗട്ട്, സാക്ഷി മാലിക്, ബജ്രംഗ് പുനിയ തുടങ്ങിയ താരങ്ങളാണ് തങ്ങളുടെ മെഡലുകള് ഗംഗയിലൊഴുക്കി പ്രതിഷേധിക്കുന്നത്. നീതി നിഷേധിക്കപ്പെട്ടുവെന്ന് പറഞ്ഞ താരങ്ങള് ഗംഗാതീരത്ത് മെഡലുകളുമായി വിങ്ങിപ്പൊട്ടി. നിരവധി പേരാണ് താരങ്ങള്ക്ക് പിന്തുണയുമായി ഹരിദ്വാറിലെത്തിയത്.
പ്രതിഷേധിക്കാനൊരുങ്ങിയ ഗുസ്തിതാരങ്ങളെ പിന്തിരിപ്പിക്കാന് കര്ഷക നേതാക്കള് ഹരിദ്വാറിലേക്ക് തിരിച്ചു. ഭാരതീയ കിസാന് യൂണിയന് നേതാവ് രാകേഷ് ടിക്കായത്ത് അടക്കമുള്ളവര് ഹരിദ്വാറിലേക്ക് തിരിച്ചു. മെഡലുകള് നദിയില് ഒഴുക്കുന്നതില് നിന്ന് താരങ്ങള് പിന്മാറണമെന്നും കര്ഷക നേതാക്കള് ആവശ്യപ്പെട്ടു. ലൈംഗികാതിക്രമം നടത്തിയ ഗുസ്തി ഫെഡറേഷന് അധ്യക്ഷനും ബി.ജെ.പി എം.പിയുമായ ബ്രിജ് ഭൂഷണിനെ അറസ്റ്റ് ചെയ്യണമെന്നാവശ്യപ്പെട്ടുള്ള സമരത്തെ കേന്ദ്ര സര്ക്കാര് അടിച്ചമര്ത്തുന്ന പശ്ചാത്തലത്തിലാണ് ഗുസ്തി താരങ്ങള് പ്രതിഷേധം കടുപ്പിച്ചത്.
