കുഴല്മന്ദം : മദ്യപിച്ച് വന്ന് ഭാര്യയെ ആക്രമിക്കുകയും ഭാര്യയുടെ മുത്തശ്ശിയെ കുത്തി പരിക്കേല്പ്പിക്കുകയും ചെയ്ത കേസില് തേങ്കുറിശി കുന്നരശം കാട് ഷിനോയിയെ (30) കുഴല്മന്ദം ഇന്സ്പെക്ടര് ആര്.രജീഷിന്റെ നേതൃത്വത്തിലുള്ള സംഘം അറസ്റ്റ് ചെയ്തു. ബുധനാഴ്ചയാണ് കേസിനാസ്പദമായ സംഭവം. മദ്യപിച്ച് വീട്ടില് വന്ന ഷിനോയ് ഭാര്യയുമായി വഴക്കുണ്ടാക്കുകയും ഭാര്യയെ മുഖത്ത് ഇടിച്ച് പരിക്കേല്പ്പിക്കുകയും ചെയ്തു. തുടര്ന്ന് ഭാര്യ കുഴല്മന്ദം പോലീസ് സ്റ്റേഷനില് പരാതി നല്കിയതോടെ ഇയാളെ സ്റ്റേഷനില് വിളിച്ച് താക്കിത് ചെയ്തിരുന്നു.
വൈകീട്ട് വീണ്ടും മദ്യപിച്ച് വീട്ടിലെത്തിയ പ്രതി ഭാര്യയെ ആക്രമിക്കുന്നത് കണ്ട് തടയാന് ചെന്ന 88 വയസ്സുള്ള മുത്തശ്ശിയെ കത്തി കൊണ്ട് ആക്രമിക്കുകയായിരുന്നു. കഴുത്തില് പരിക്കേറ്റ മുത്തശ്ശി കുഴല്മന്ദം സാമൂഹികാരോഗ്യകേന്ദ്രത്തില് ചികിത്സ തേടി. തുടര്ന്ന് പോലീസ് കേസെടുക്കുകയായിരുന്നു. കുത്താന് ഉപയോഗിച്ച കത്തി കണ്ടെടുത്തു. പ്രതി മദ്യത്തിനും കഞ്ചാവിനും അടിമയാണെന്ന് പോലീസ് പറഞ്ഞു. പ്രതിയെ കോടതി റിമാന്ഡ് ചെയ്തു. എസ്.ഐമാരായ സി.കെ സുരേഷ്, എ.എസ്.ഐ രജിത, സി.പി.ഒ പ്രവീണ്, ബ്ലസന്, ബവീഷ് എന്നിവരാണ് സംഘത്തിലുണ്ടായിരുന്നത്.
