ആലപ്പുഴ: ബൈക്കിലെത്തി നടന്നുപോകുന്ന സ്ത്രീകളുടെ മാല കവരുന്ന പ്രതി പിടിയില്. മാരാരിക്കുളം തെക്ക് പഞ്ചായത്ത് എട്ടാം വാര്ഡില് പാതിരാപ്പള്ളി തകിടുവെളി വീട്ടില്നിന്ന് ആലപ്പുഴ നഗരസഭ പുന്നമട വാര്ഡില് കൊറ്റംകുളങ്ങര സുകൃതം വീട്ടില് വാടകയ്ക്ക് താമസിക്കുന്ന അരുണ് രാജാണ് (24) പിടിയിലായത്. അരൂര് ക്ഷേത്രത്തിന് കിഴക്കുവശം മയൂരം റോഡിലൂടെ നടന്നുപോയ വയോധികയുടെ മാല പൊട്ടിച്ചെടുത്ത് സ്കൂട്ടറില് കടന്നുകളഞ്ഞ കേസില് പിടിയിലായതോടെയാണ് മറ്റ് കേസുകള്ക്കും വഴിത്തിരിവായത്.
കുത്തിയതോട് പോലീസ് സ്റ്റേഷന് പരിധിയില് മൂന്നും പട്ടണക്കാട് പരിധിയില് ഒന്നും കവര്ച്ചകള് നടത്തിയിരുന്നതായി ഇയാള് സമ്മതിച്ചു. ഇടറോഡ് കേന്ദ്രീകരിച്ച് ബൈക്കില് യാത്ര ചെയ്ത് നടന്നുപോകുന്ന സ്ത്രീകളുടെ മാല മോഷ്ടിച്ച് കടന്നുകളയുകയാണ് രീതി. അരൂര് പോലീസും ചേര്ത്തല ഡിവൈ.എസ്.പി സ്ക്വാഡ് അംഗങ്ങളും ചേര്ന്ന് സി.സി.ടി.വി ദൃശ്യങ്ങള് കേന്ദ്രീകരിച്ച് നടത്തിയ അന്വേഷണത്തിനൊടുവിലാണ് പ്രതി പിടിയിലായത്. ചേര്ത്തല കോടതിയില് ഹാജരാക്കിയ പ്രതിയെ റിമാന്ഡ് ചെയ്തു.