തിരുവനന്തപുരം : ഓണ്ലൈന് വ്യാപാര കമ്പനികളില് തുക നിക്ഷേപിച്ചാല് ഇരട്ടിയാകുമെന്ന് പറഞ്ഞ് സംസ്ഥാനത്തിന്റെ വിവിധ ഭാഗങ്ങളില് നാലര കോടിയുടെ തട്ടിപ്പ് നടത്തിയ ആളെ പന്തീരാങ്കാവ് പോലിസ് അറസ്റ്റു ചെയ്തു. പശ്ചിമ ബംഗാളില് വച്ചാണ് തിരുവനന്തപുരം കിളിമാനൂര് സ്വദേശിയായ ഷിജിയെ അറസ്റ്റു ചെയ്തത്. ഇയാളെ കോടതി റിമാന്ഡ് ചെയ്തു.
ഓണ്ലൈന് വ്യാപാര കമ്പനികളുടെ സെല്ലര് അക്കൗണ്ടുകളില് ലക്ഷങ്ങള് നിക്ഷേപിച്ചാല് 10 ദിവസം കൊണ്ട് ഇരട്ടിയാകും എന്ന് പറഞ്ഞായിരുന്നു തട്ടിപ്പ്. കോഴിക്കോട് പെരുമണ്ണ സ്വദേശിയുടെ 23 അര ലക്ഷം രുപ തട്ടിയെടുത്ത കേസിലാണ് ഷിജി അറസ്റ്റിലായത്. സംസ്ഥാനത്തിന്റെ വിവിധ ഭാഗങ്ങളില് നിന്നായി നാലരക്കോടി രൂപയുടെ തട്ടിപ്പ് നടത്തിയെന്നാണ് നിഗമനം. ഓണ്ലൈന് വ്യാപാര സ്ഥാപനങ്ങളുടെ സെല്ലര് അക്കൗണ്ടുകളില് മുംബൈ ആസ്ഥാനമായി പ്രവര്ത്തിക്കുന്ന ഗ്ലാംസ് ട്രേഡിങ് സ്ഥാപനത്തിലൂടെ പണം നിക്ഷേപിക്കാന് ആവശ്യപ്പെട്ടായിരുന്നു തട്ടിപ്പ്. കോഴിക്കോട് ജില്ലയ്ക്ക് പുറമെ പാലക്കാട്, മലപ്പുറം, തിരുവനന്തപുരം ജില്ലകളിലാണ് തട്ടിപ്പ് നടത്തിയതായി പരാതിയുള്ളത്.
ഡല്ഹി, ഉത്തര്പ്രദേശ്, മഹാരാഷ്ട്ര സ്വദേശികളാണ് കൂട്ടുപ്രതികള്. ഒരാഴ്ച നീണ്ട പശ്ചിമ ബംഗാളിലെ അന്വേഷണത്തിന് ശേഷമാണ് പ്രതി പിടിയിലായത്. ഇയാള്ക്കെതിരെ മറ്റ് സാമ്പത്തിക തട്ടിപ്പ് കേസുകളും ഉള്ളതായാണ് വിവരം. കൂടുതല് അന്വേഷണം ആവശ്യമായതിനാല് പ്രതിയെ വരും ദിവസങ്ങളില് കസ്റ്റഡിയില് വാങ്ങും.
