കൊച്ചി : സ്വകാര്യ ബസില് ഒപ്പം യാത്രചെയ്ത യുവതിയെ ശല്യംചെയ്തത് കണ്ടക്ടറുടെ ശ്രദ്ധയില്പ്പെടുത്തിയ യുവാവിനെ നടുറോഡില് കുത്തിക്കൊലപ്പെടുത്താന് ശ്രമം. ചോറ്റാനിക്കര നാഗപ്പടി കോളനിയില് മലയപ്പറമ്പ് വീട്ടില് സുനില്കുമാറിനാണ് (38) കുത്തേറ്റത്. കഴുത്തിനും നെഞ്ചിനും പരിക്കേറ്റ ഇയാള് കൊച്ചിയിലെ സ്വകാര്യ ആശുപത്രിയില് ചികിത്സയിലാണ്. പനങ്ങാട് സ്വദേശിയും നിരവധി കേസുകളിലെ പ്രതിയുമായ അനില്കുമാറിനെ നാട്ടുകാര് തടഞ്ഞുവച്ച് പോലീസിന് കൈമാറി. ഇയാളുടെ അറസ്റ്റ് രേഖപ്പെടുത്തി.
സുനില് എറണാകുളത്തുനിന്ന് തൃപ്പൂണിത്തുറയിലേക്ക് യാത്രചെയ്യുന്നതിനിടെ വ്യാഴാഴ്ച ഉച്ചതിരിഞ്ഞാണ് സംഭവം. യുവതിയെ ഉപദ്രവിക്കുന്ന വിവരം കണ്ടക്ടറെ അറിയിച്ചതോടെ സുനിലും അനില്കുമാറും തമ്മില് വാക്കുതര്ക്കമായി. ബസ് ജീവനക്കാര് ഇരുവരെയും വൈറ്റില ഹബ്ബില് ഇറക്കിവിട്ടു. ഇതിനിടെ അനില്കുമാര് സുനിലിനെ കത്തി ഉപയോഗിച്ച് കുത്തി വീഴ്ത്തുകയായിരുന്നു. ഓടിരക്ഷപ്പെടാന് ശ്രമിച്ച പ്രതിയെ വൈറ്റില ഹബ്ബിലെ ഓട്ടോറിക്ഷാ തൊഴിലാളികള് തടഞ്ഞുവയ്ക്കുകയായിരുന്നു. വിവരമറിഞ്ഞ് മരട് പോലീസെത്തി ഇയാളെ അറസ്റ്റ് ചെയ്യുകയായിരുന്നു. എറണാകുളം സെന്ട്രല്, കടവന്ത്ര, പനങ്ങാട് സ്റ്റേഷനുകളില് മയക്കുമരുന്ന്, അടിപിടി പോലീസ് സ്റ്റേഷന് ആക്രമണമടക്കം നിരവധി കേസുകളുണ്ട്. പ്രതിയെ റിമാന്ഡ് ചെയ്തു.
