പാലക്കാട്: മകന് ഉമ്മ കൊടുക്കാന്‍ പോയപ്പോള്‍ പല്ലുതേക്കാന്‍ പറഞ്ഞ ഭാര്യയെ ഭര്‍ത്താവ് വെട്ടിക്കൊലപ്പെടുത്തി. മണ്ണാര്‍ക്കാട് പള്ളിക്കുറിപ്പിലാണ് സംഭവം. കോയമ്പത്തൂര്‍ സ്വദേശി ദീപികയാണ് കൊല്ലപ്പെട്ടത്. സംഭവത്തില്‍ ഭര്‍ത്താവ് അവിനാശിനെ പോലീസ് കസ്റ്റഡിയിലെടുത്തു. ഇന്ന് രാവിലെ എട്ടരയോടെയാണ് നാടിനെ ഞെട്ടിച്ച സംഭവം.
അവിനാശിന്റെ വീട്ടിലെ ഹാളില്‍ വെച്ച്‌ ഭാര്യ ദീപികയെ കൊടുവാള്‍ ഉപയോഗിച്ച് വെട്ടുകയായിരുന്നു. കഴുത്തിനും കൈയ്ക്കും ഗുരുതരമായി പരുക്കേറ്റ ഇവരെ ആശുപത്രിയിലെത്തിച്ചെങ്കിലും വഴിമധ്യേ മരിച്ചു. വീടിന്റെ വാതില്‍ അടച്ചിട്ട ശേഷമാണ് വെട്ടി പരുക്കേല്‍പ്പിച്ചത്. വീട്ടുകാരുടെ ബഹളം കേട്ടാണ് സമീപവാസികള്‍ ഓടിയെത്തിയത്. ഭര്‍ത്താവ് അവിനാഷിനെ നാട്ടുകാരും ബന്ധുക്കളും ചേര്‍ന്ന് തടഞ്ഞുവെച്ച്‌ പോലീസിന് കൈമാറി.
