തിരുവനന്തപുരം: നാല് മാസം വളര്ച്ചയെത്തിയ കുഞ്ഞിന്റെ ഭ്രൂണം ഉപേക്ഷിച്ച യുവതിയെ പോലീസ് അറസ്റ്റ് ചെയ്തു. വലിയതുറയിലെ ദുരിതാശ്വാസ ക്യാമ്ബില് കഴിയുന്ന സിജിയെയാണ് (24) വലിയതുറ പോലീസ് അറസ്റ്റ് ചെയ്തത്. ഇക്കഴിഞ്ഞ 28നായിരുന്നു സംഭവം. ഗുളിക കഴിച്ച് ഗര്ഭം അലസിപ്പിച്ച ശേഷം ഭ്രൂണം ബക്കറ്റിലാക്കി ഉപേക്ഷിച്ചെന്നാണ് കേസ്. ഭര്ത്താവുമായി വേര്പിരിഞ്ഞു കഴിയുന്ന സിജി ഗര്ഭം അലസിപ്പിക്കാനായി പലപ്പോഴായി മരുന്ന് കഴിച്ചിരുന്നു. ഭ്രൂണം കൊണ്ടുപോകാനായി ഉപയോഗിച്ച ബക്കറ്റ് വൃത്തിയാക്കുന്നതു കണ്ട് സംശയം തോന്നി മറ്റുള്ളവര് നടത്തിയ പരിശോധനയിലാണ് സംഭവം പുറത്തായത്. സിജിയെ കസ്റ്റഡിയിലെടുത്ത പോലീസ് തൈക്കാട് സ്ത്രീകളുടെയും കുട്ടികളുടെയും ആശുപത്രിയിലെത്തിച്ചു. ഭ്രൂണം മെഡിക്കല് കോളേജ് ആശുപത്രിയില് പരിശോധനയ്ക്ക് വിധേയമാക്കി. തുടര്ന്ന് നടത്തിയ ചോദ്യം ചെയ്യലിലാണ് സിജി കുറ്റം സമ്മതിച്ചത്.
