യുവതി ആത്മഹത്യ ചെയ്തതുമായി ബന്ധപ്പെട്ട് ഒപ്പം താമസിച്ചിരുന്നയാള്‍ അറസ്റ്റില്‍

വെഞ്ഞാറമൂട് : യുവതി ആത്മഹത്യ ചെയ്തതുമായി ബന്ധപ്പെട്ട് ഒപ്പം താമസിച്ചിരുന്നയാള്‍ അറസ്റ്റില്‍. കരിക്കകം ചരുവിള പുത്തന്‍ വീട്ടില്‍ ഗൗരിയുടെ (21) ആത്മഹത്യയുമായി ബന്ധപ്പെട്ട് വെള്ളുമണ്ണടി ബി.ആര്‍. ഭവനില്‍ അഭിരാം (22) ആണ് അറസ്റ്റിലായത്. ഞായറാഴ്ചയായിരുന്നു കേസിനാസ്പദമായ സംഭവം. ഇരുവരും വാടകക്ക് താമസിച്ചിരുന്ന വീട്ടിലെ കിടപ്പുമുറിയില്‍ രാവിലെ 11ഓടെ ഗൗരിയുടെ മൃതദേഹം കാണപ്പെടുകയായിരുന്നു. തുടര്‍ന്ന് ബന്ധുക്കള്‍ അഭിരാമും ഗൗരിയും തമ്മില്‍ നിരന്തരം വഴക്കിടാറുണ്ടന്നും ഗൗരിയെ മര്‍ദിക്കാറുണ്ടായിരുന്നെന്നും കാണിച്ച്‌ വെഞ്ഞാറമൂട് പോലീസില്‍ പരാതി നല്‍കി. ഇതിന്റെ അടിസ്ഥാനത്തില്‍ പോലീസ് അടുത്ത ദിവസം അഭിരാമിനെ കസ്റ്റഡിയിലെടുക്കുകയും ചോദ്യം ചെയ്യലില്‍ പരാതിയില്‍ കഴമ്പുണ്ടെന്ന് കണ്ടെത്തിയതിനെ തുടര്‍ന്ന് അറസ്റ്റ് രേഖപ്പെടുത്തി കോടതിയില്‍ ഹാജരാക്കുകയുമായിരുന്നു.