ഇരവിപുരം: ക്വാറന്റീന് ലംഘനം ചോദ്യംചെയ്തതിന് ആരോഗ്യ പ്രവര്ത്തകരെ ആക്രമിക്കുകയും ജോലി തടസ്സപ്പെടുത്തുകയും ചെയ്ത കേസില് പ്രധാനപ്രതിയെ ഇരവിപുരം പോലീസ് അറസ്റ്റ് ചെയ്തു. തെക്കേവിള ലക്ഷ്മി നഗര് 171 പുത്തന്നട വീട്ടില് റീനാ ഭവനില് സുജുവാണ് (24) അറസ്റ്റിലായത്.
കേസുമായി ബന്ധപ്പെട്ട് ഇയാളുടെ പിതാവ് സഫറിനെ (63) നേരത്തേ അറസ്റ്റ് ചെയ്തിരുന്നു. ഈ കേസില് ഒരാളെക്കൂടി പിടികൂടാനുണ്ട്. ഇയാള്ക്കായി പോലീസ് തെരച്ചില് ആരംഭിച്ചിട്ടുണ്ട്. ജൂണ് പതിനൊന്നിന് രാത്രി പത്തോടെ പിടിയിലായ പ്രതിയുടെ വീടിന് സമീപത്തായിരുന്നു സംഭവം.
കന്യാകുമാരിയില് നിന്നെത്തിയ ഒരാള് ക്വാറന്റീന് ലംഘിച്ച് കറങ്ങി നടക്കുന്നതായി ശ്രദ്ധയില്പെട്ടതിനെ തുടര്ന്ന് സ്ഥലത്തെത്തിയ ഇരവിപുരം ജെ.എച്ച്.ഐ സുനില്കുമാറിനെയും സംഘത്തെയും മൂന്നംഗസംഘം ആക്രമിച്ചെന്നാണ് കേസ്. സംഭവമറിഞ്ഞ് സ്ഥലത്തെത്തിയ ഇരവിപുരം പോലീസ് പ്രതികള്ക്കെതിരെ കേസെടുക്കുകയായിരുന്നു.
