പന്തളം : എം.സി. റോഡ് മുറിച്ചു കടക്കുന്നതിനിടെ കാർ ഇടിച്ചു വീഴ്ത്തിയ യുവാവ് മറ്റൊരു കാർ ദേഹത്ത് കയറി മരിച്ചു. പന്തളം കുരമ്പാല ശങ്കരത്തിൽ കുളത്ത് വടക്കേതിൽ പരേതനായ യോഹന്നാന്റ മകൻ കെ.വൈ.ബിജു(44)വാണ് മരിച്ചത്. തിങ്കളാഴ്ച രാത്രി ഏഴുമണിയോടെ എം.സി. റോഡിൽ മെഡിക്കൽ മിഷൻ കവലയ്ക്ക് സമീപമാണ് അപകടം. റോഡ് മുറിച്ച് കടക്കുമ്പോൾ അടൂരിൽ നിന്നും പന്തളം ഭാഗത്തേക്ക് വരികയായിരുന്ന കാർ ബിജുവിനെ ഇടിച്ചു വീഴ്ത്തുകയായിരുന്നു. ഇടിച്ച കാർ നിർത്താതെ ഓടിച്ചുപോയി.
റോഡിൽവീണ ബിജുവിന്റെ ദേഹത്തേക്ക് പന്തളത്തുനിന്നും അടൂർ ഭാഗത്തേക്കു പോവുകയായിരുന്നു കാർ കയറിയിറങ്ങുകയായിരുന്നു. ഉടൻ തന്നെ നാട്ടുകാർ പന്തളത്തെ സ്വകാര്യ ആശുപത്രിയിലും പിന്നീട് പരുമലയിലെ സ്വകാര്യ ആശുപത്രിയിലുമെത്തിച്ചെങ്കിലും ജീവൻ രക്ഷിക്കാനായില്ല. മെഡിക്കൽ മിഷൻ സ്റ്റാൻഡിലെ ഓട്ടോറിക്ഷ ഡ്രൈവറാണ് ബിജു. അമ്മ: പരേതയായ മേരി യോഹന്നാൻ. ഭാര്യ: ജിനു. മക്കൾ: ജോയൽ, ജോഷ്വ, ജോബ്.
