മലപ്പുറം : ഭാര്യ കാണാന് വിസമ്മതിച്ചതിന്റെ പേരില് ആത്മഹത്യാ ഭീഷണി മുഴക്കി യുവാവ്. ഇന്നലെ വൈകീട്ട് എടപ്പാളില് വെച്ചായിരുന്നു പോലീസിനെയും നാട്ടുകാരെയും വട്ടംകറക്കിക്കൊണ്ട് യുവാവ് ആത്മഹത്യാ ഭീഷണി മുഴക്കിയത്. എടപ്പാള് മേല്പ്പാലത്തില് കയറി നിന്നായിരുന്നു യുവാവിന്റെ ഭീഷണി. ഇടുക്കി സ്വദേശിയും എറണാകുളം റൂട്ടില് ഓടുന്ന ബസിലെ ജീവനക്കാരനുമായ യുവാവ് സ്വകാര്യ ആശുപത്രിയില് ജോലി ചെയ്യുന്ന ഭാര്യയെ കാണാനായി നഗരത്തില് എത്തിയതായിരുന്നു. എന്നാല് ഇയാളെ കാണാന് ഭാര്യ കൂട്ടാക്കിയില്ല. ഇതേ തുടര്ന്നായിരുന്നു നാടകീയ രംഗങ്ങള് അരങ്ങേറിയത്.
ഭാര്യ കാണാന് വിസമ്മതിച്ചതിന് പിന്നാലെ എടപ്പാള് ഗോവിന്ദ ടാക്കീസിന് സമീപത്തെത്തിയ യുവാവ് മദ്യലഹരിയില് റോഡില് കിടക്കുകയും വാഹനങ്ങള് തടയുകയുമായിരുന്നു. ഇവിടെ നിന്നും ഒരു വാഹനത്തില് കയറി എടപ്പാള് ടൗണിലെത്തുകയായിരുന്നു. ഇതിനിടെ യുവാവിനെ വാഹനത്തില് കേറ്റി പോലീസ് സ്റ്റേഷനില് എത്തിക്കാന് സ്ഥലത്തുണ്ടായിരുന്ന ഹോം ഗാര്ഡും ഡ്രൈവര്മാരും നാട്ടുകാരും ശ്രമിച്ചെങ്കിലും ഇവരെ യുവാവ് ആക്രമിക്കുകയായിരുന്നു. ഇതിന് ശേഷമേ പാലത്തില് കയറി താഴേക്ക് ചാടുമെന്ന് ഭീഷണി മുഴക്കിയത്.
