ഇടുക്കി : ചിന്നക്കനാൽ മുന്നൂറ്റൊന്ന് കോളനിയിൽ കാട്ടാനകൾ യുവാവിനെ ഓടിച്ച് മരത്തിൽ കയറ്റി. ഒന്നര മണിക്കൂറോളം മരത്തിന് മുകളിൽ ഇരുന്നു. നാട്ടുകാരും വനം വകുപ്പ് വാച്ചർമാരും സ്ഥലത്ത് എത്തി കാട്ടനകളെ ഓടിച്ച ശേഷമാണ് യുവാവിന് താഴെയിറങ്ങാനായത്. സിങ്കുകണ്ടം സ്വദേശി സജി ആണ് രാവിലെ കൃഷിയിടത്തിൽ വെച്ച് കാട്ടാനക്കൂട്ടത്തിന്റെ മുന്നിൽ പെട്ടത്. ഒരു കൊമ്പനും പിടിയാനയും രണ്ട് കുട്ടിയാനകളുമാണ് കാട്ടാനക്കൂട്ടത്തില് ഉണ്ടായിരുന്നത്. കൊമ്പൻ പാഞ്ഞടുത്തതോടെ സജി സമീപത്തെ പുൽമേട്ടിലുള്ള യൂക്കാലി മരത്തിന്റെ മുകളിൽ കയറി. ആനക്കൂട്ടം താഴെയും നിലയുറപ്പിച്ചു. നാട്ടുകാരും വനം വകുപ്പ് ഉദ്യോഗസ്ഥരും പടക്കം പൊട്ടിച്ചും ബഹളം വെച്ചും ഏറെ പണിപ്പെട്ടാണ് കാട്ടാനകളെ തുരത്തിയത്. പ്രദേശത്ത് കഴിഞ്ഞ കുറച്ച് നാളുകളായി കാട്ടാന ശല്യം രൂക്ഷമാണ്.
