വൈക്കം : കോട്ടയം വൈക്കത്ത് വീട്ടുവളപ്പിൽ കഞ്ചാവ് ചെടി നട്ടുവളർത്തുകയും ഉണക്ക കഞ്ചാവ് കൈവശം സൂക്ഷിക്കുകയും ചെയ്ത കേസിൽ യുവാവിനെ എക്സൈസ് അറസ്റ്റ് ചെയ്തു. മറവൻതുരുത്ത് അപ്പക്കോട് ലക്ഷംവീട് നഗർ സ്വദേശിയായ വിനീത് രാജൻ (40) ആണ് വൈക്കം എക്സൈസിന്റെ പിടിയിലായത്. എക്സൈസിന് ലഭിച്ച രഹസ്യ വിവരത്തിന്റെ അടിസ്ഥാനത്തിൽ തിങ്കളാഴ്ച രാവിലെ നടത്തിയ പരിശോധനയിലാണ് പ്രതിയുടെ വീട്ടിൽ നിന്ന് കഞ്ചാവ് ചെടിയും ലഹരിവസ്തുവും കണ്ടെത്തിയത്. രാവിലെ 8.30ഓടെ നടത്തിയ പരിശോധനയിൽ ഏകദേശം ഒന്നര മീറ്റർ ഉയരമുള്ള കഞ്ചാവ് ചെടിയാണ് വീട്ടുവളപ്പിൽ നിന്ന് കണ്ടെത്തിയത്. കൂടാതെ ഇയാളുടെ കൈവശം സൂക്ഷിച്ചിരുന്ന ആറു ഗ്രാം ഉണക്ക കഞ്ചാവും എക്സൈസ് സംഘം പിടിച്ചെടുത്തു. വൈക്കം റേഞ്ച് എക്സൈസ് ഇൻസ്പെക്ടർ ടി.എ. പ്രമോദിന്റെ നേതൃത്വത്തിൽ നടത്തിയ പരിശോധനയ്ക്കൊടുവിലാണ് പ്രതിയെ കസ്റ്റഡിയിലെടുത്തത്.
സംഭവത്തിൽ എൻഡിപിഎസ് നിയമപ്രകാരം കേസ് രജിസ്റ്റർ ചെയ്ത് തുടർനടപടികൾ സ്വീകരിച്ചതായി അധികൃതർ അറിയിച്ചു. മറ്റൊരു സംഭവത്തിൽ കൊച്ചി പെരുമ്പാവൂരില് പച്ചക്കറികള്ക്കൊപ്പം കഞ്ചാവ് ഒളിപ്പിച്ചു കടത്താന് ശ്രമിച്ച അന്യസംസ്ഥാനക്കാരനെ ബസിനുള്ളില് നിന്നും പിടികൂടി. ഓപ്പറേഷന് തൂഫാന്റെ ഭാഗമായി നടത്തിയ പരിശോധനയിലാണ് പ്രതി പിടിയിലായത്. ഞായറാഴ്ച പെരുമ്പാവൂരിലെ ബസില് നടത്തിയ പരിശോധനയിലാണ് ആസാം സ്വദേശിയായ ഹസീബുള് മണ്ഡല് പിടിയിലായത്. ബസില് പരിശോധന നടക്കുന്നതിനിടെ കഞ്ചാവ് ബര്ത്തിലേക്ക് വലിച്ചെറിഞ്ഞ് രക്ഷപ്പെടാന് ശ്രമിച്ചെങ്കിലും ഇയാളെ പോലീസ് പിടികൂടുകയായിരുന്നു. ഇയാളുടെ കൈവശം ഉണ്ടായിരുന്ന പ്ലാസ്റ്റിക് കവറില് ചീരയോടൊപ്പം വലിയ പൊതികളിലായാണ് കഞ്ചാവ് സൂക്ഷിച്ചിരുന്നത്.
