തിരുവനന്തപുരം: കെ. സുരേന്ദ്രന്റെ പ്രസ്താവനയില് യൂത്ത് കോണ്ഗ്രസ് സംസ്ഥാന സെക്രട്ടറി വീണ എസ് നായര് മുഖ്യമന്ത്രിക്കും വനിതാ കമ്മീഷനും പരാതി നല്കി. സി.പി.ഐ.എം വനിതാ നേതാക്കള്ക്കെതിരായ പ്രസ്താവനയ്ക്കെതിരെയാണ് വീണ എസ് നായര് പരാതി നല്കിയിരിക്കുന്നത്. വനിതാ നേതാക്കളെ പൂതനയോടു ഉപമിക്കുകയും, ബോഡി ഷെയ്മിങ്ങിനു വിധേയമാക്കുകയും ചെയ്ത പ്രസ്താവന സ്ത്രീത്വത്തെ അപമാനിക്കുന്നതാണ്. സ്ത്രീകളുടെ അഭിമാനത്തെ ചോദ്യം ചെയ്യുന്ന പ്രസ്തുത നടപടിയില് കെ സുരേന്ദ്രനെതിരെ പോലീസ് കേസ് രജിസ്റ്റര് ചെയ്ത് നിയമ നടപടി സ്വീകരിക്കണമെന്നും പരാതിയില് വീണ എസ് നായര് ആവശ്യപ്പെടുന്നു.
”കേരളത്തിലെ മാര്ക്സിസ്റ്റ് വനിതാ നേതാക്കളെല്ലാം കാശടിച്ചു മാറ്റി….തടിച്ചു കൊഴുത്തു പൂതനകളായി. അവര് കേരളത്തിലെ സ്ത്രീകളെ കളിയാക്കിക്കൊണ്ടിരിക്കുകയാണ് ‘ എന്ന ബി ജെ പി സംസ്ഥാന പ്രസിഡന്റ് കെ സുരേന്ദ്രന്റെ കഴിഞ്ഞ ദിവസത്തെ പ്രസ്താവന അങ്ങേയറ്റം അപമാനകരവും സ്ത്രീകളോടുള്ള നീച മനോഭാവത്തിന്റെ പ്രതിഫലനവുമാണെന്ന് പരാതിയില് ചൂണ്ടിക്കാട്ടുന്നു. അതേസമയം വിവാദ പരാമര്ശത്തില് ബിജെപി സംസ്ഥാന അദ്ധ്യക്ഷന് കെ സുരേന്ദ്രനെതിരെ കേസെടുക്കണണമെന്ന് പ്രതിപക്ഷ നേതാവ് വി ഡി സതീശനും ആവശ്യപ്പെട്ടു. സുരേന്ദ്രന് പ്രസ്താവന പിന്വലിച്ച് മാപ്പ് പറയണം. തിരുത്തിയില്ലെങ്കില് കേസെടുക്കണമെന്നും വി ഡി സതീശന് ആവശ്യപ്പെട്ടു.
