തിരുവനന്തപുരം: നെയ്യാറ്റിന്കരയില് യൂത്ത് കോണ്ഗ്രസ് മണ്ഡലം പ്രസിഡന്റിനെ ആക്രമിച്ച സംഭവത്തില് മൂന്ന് കോണ്ഗ്രസ് നേതാക്കള്ക്കെതിരെ പോലീസ് കേസെടുത്തു. യൂത്ത് കോണ്ഗ്രസ് പെരുങ്കടവിള മണ്ഡലം പ്രസിഡന്റ് ഇടവഴിക്കര ജയനെ(36) മര്ദിച്ചെന്ന പരാതിയിലാണ് നടപടി . സംഭവുമായി ബന്ധപ്പെട്ട് കോണ്ഗ്രസ് ജില്ലാ ജനറല് സെക്രട്ടറി മാരായിമുട്ടം സുരേഷ്, കോണ്ഗ്രസ് പ്രവര്ത്തകരായ സന്തോഷ്, സുഭാഷ് എന്നിവര്ക്കെതിരെയാണ് മാരായമുട്ടം പോലീസ് വധശ്രമത്തിന് കേസെടുത്തിരിക്കുന്നത്.
കഴിഞ്ഞ ദിവസം വൈകിട്ടായിരുന്നു ആക്രമണം. മാരായിമുട്ടം സര്വ്വീസ് സഹകരണ ബാങ്കിന് മുന്നില്വച്ച് ജയനെ മൂന്നംഗ സംഘം കമ്പിപ്പാരകൊണ്ട് തലക്കടിച്ച് പരുക്കേല്പ്പിക്കുകയായിരുന്നു . ഗുരുതരമായി പരുക്കേറ്റ ജയന് തിരുവനന്തപുരം മെഡിക്കല് കോളേജ് ആശുപത്രിയില് ചികിത്സയിലാണ്. അപകട നില തരണം ചെയ്തുവരുന്നതായി ആശുപത്രി അധികൃതര് അറിയിച്ചു. കോണ്ഗ്രസിനുള്ളിലെ ചേരിപ്പോരാണ് ആക്രമണത്തിന് പിന്നിലുള്ള കാരണമെന്ന് പോലീസ് പറഞ്ഞു.
