കണ്ണൂര്: മുഖ്യമന്ത്രി പിണറായി വിജയനെതിരെ ഇന്ഡിഗോ വിമാനത്തില് പ്രതിഷേധിച്ച ഫര്സീന് മജീദിനെതിരെ കാപ്പ ചുമത്താനുള്ള നീക്കത്തിനെതിരെ യൂത്ത് കോണ്ഗ്രസ് പ്രതിഷേധം. യൂത്ത് കോണ്ഗ്രസ് നേതാവ് റിജില് മാക്കുറ്റിയുടെ നേതൃത്വത്തില് കണ്ണൂര് കളക്ട്രേറ്റിന് മുന്പില് സംഘടിപ്പിച്ച പ്രതിഷേധത്തിനിടെ പ്രവര്ത്തകര് പോലീസുമായി സംഘര്ഷമുണ്ടായി.പോലീസുമായി പ്രവര്ത്തകര് വാക്കേറ്റത്തിലേര്പ്പെട്ടു. ബാരിക്കേഡ് തകര്ക്കാന് ശ്രമിച്ച പ്രവര്ത്തകര്ക്ക് നേരെ പോലീസ് ജലപീരങ്കി പ്രയോഗിച്ചു. ബാരിക്കേഡിന് മുകളില് കയറിയ പ്രവര്ത്തകര് പോലീസ് വാഹനത്തിന് നേരെ കമ്പേറിഞ്ഞു.
പ്രവര്ത്തകര് ഇതുവരെയും പിരിഞ്ഞുപോകാന് തയാറായിട്ടില്ല. ഡിവൈഎസ്പിയുടെ നേതൃത്വത്തില് വന് പോലീസ് സന്നാഹമാണ് സ്ഥലത്ത് തമ്പടിച്ചിരിക്കുന്നത്.ഫര്സീനെതിരെ നിരവധി കേസുകളുണ്ടെന്നും ജില്ലയില് നിന്നും നാടുകടത്തണമെന്നുമായിരുന്നു കമ്മീഷണര് ആര്. ഇളങ്കോ സമര്പ്പിച്ച റിപ്പോട്ടിലുള്ളത്. തുടര്ന്ന് ഡി ഐജി രാഹുല് ആര്. നായര്, ഫര്സീന് കാരണം കാണിക്കല് നോട്ടീസ് നല്കി. കേസുകളുടെ വിശദാംശങ്ങള് ഉള്പ്പെടുത്തിയാണ് ഫര്സീന് ഡി ഐജിക്ക് മറുപടി നല്കിയത്.
