റാന്നി: യുവാക്കള്‍ക്കിടയില്‍ വര്‍ദ്ധിച്ചു വരുന്ന മയക്കുമരുന്ന് ഉപയോഗത്തിനെതിരെ ശക്തമായ ബോധവത്ക്കരണ പരിപാടികള്‍ നടത്തുവാന്‍ ബന്ധപ്പെട്ടവര്‍ തയ്യാറാകണമെന്ന് ഭഗത്‌സിംഗ് യൂത്തുഫോഴ്സ് റാന്നി മണ്ഡലം ക്യാമ്പ് പ്രമേയത്തിലൂടെ ആവശ്യപ്പെട്ടു. എ.ഐ.വൈ.എഫ് നേതൃത്വത്തില്‍ ദുരന്തമേഖലകളില്‍ പ്രതിരോധ പ്രവര്‍ത്തനങ്ങളില്‍ ഏര്‍പ്പെടുന്നതിന് യുവാക്കളെ സജ്ജമാക്കുന്നതിനുള്ള പരിശീലനം നല്‍കുന്ന ക്യാമ്പിലാണ് ആവശ്യമുയര്‍ന്നത്. വിവിധ സ്ഥലങ്ങളില്‍ ഇതുമായി ബന്ധപ്പെട്ട് യുവാക്കളെ സംഘടിപ്പിച്ച് ബോധവത്ക്കരണ ക്ലാസുകള്‍ നടത്താന്‍ ക്യാമ്പ് തീരുമാനിച്ചു.
എ.ഐ.വൈ.എഫ് ജില്ലാ സെക്രട്ടറി എസ് അഖില്‍ ഉദ്ഘാടനം ചെയ്തു. മണ്ഡലം പ്രസിഡന്‍റ് ഹാപ്പി പ്ലാച്ചേരി അധ്യക്ഷത വഹിച്ചു. ജില്ലാ പ്രസിഡന്‍റ് അഡ്വ. സുഹാസ് എം ഹനീഫ്,സി.പി.ഐ ജില്ലാ കൗണ്‍സിലംഗം എം.വി പ്രസന്നകുമാര്‍, യൂത്ത് ഫോഴ്സ് ജില്ലാ ക്യാപ്റ്റന്‍ പ്രശാന്ത് പാടം, ജോജോ കോവൂര്‍,വിപിന്‍ പി.പൊന്നപ്പന്‍ എന്നിവര്‍ പ്രസംഗിച്ചു. ഭാരവാഹികളായി പി. അനീഷ് മോന്‍ (മണ്ഡലം ക്യാപ്റ്റന്‍), എം. കെ ജയപ്രകാശ്,എം മജ്ഞു,സച്ചു,ശരത്(വൈസ് ക്യാപ്റ്റന്‍മാര്‍) എന്നിവർ പങ്കെടുത്തു.
