തിരുവനന്തപുരം: സിപിഎം കളമശ്ശേരി ഏരിയാ സെക്രട്ടറി സക്കീര് ഹുസൈനെതിരായ പാര്ട്ടി നടപടി സംസ്ഥാന നേതൃത്വം അംഗീകരിച്ചു. സക്കീര് ഹുസൈനെ ആറ് മാസത്തേക്ക് പാര്ട്ടിയില് നിന്ന് സസ്പെന്ഡ് ചെയ്ത ജില്ലാ കമ്മിറ്റിയുടെ തീരുമാനമാണ് സംസ്ഥാന സെക്രട്ടറിയേറ്റ് യോഗം ശരിവെച്ചിരിക്കുന്നത്. അനധികൃത സ്വത്ത് സമ്പാദനം സംബന്ധിച്ച കണ്ടെത്തലിനെ തുടര്ന്നായിരുന്നു ഈ നടപടി. പാര്ട്ടി അന്വേഷണ കമ്മീഷന് റിപ്പോര്ട്ടിന്റെ അടിസ്ഥാനത്തിലായിരുന്നു നടപടിയെടുത്തത്.
സക്കീര് ഹുസൈന് നാല് വീടുകളുണ്ടെന്നും ഈ വീടുകളുണ്ടാക്കാനുള്ള പണവും സ്വത്തും ക്രമക്കേടുകളിലൂടെയാണ് സമ്പാദിച്ചത് എന്നുമായിരുന്നു ഉയര്ന്ന പരാതി. ജില്ലാ കമ്മിറ്റിയാണ് സക്കീര് ഹുസൈനെതിരെ അന്വേഷണത്തിന് രണ്ടംഗ സമിതിയെ നിയോഗിച്ചത്. സി എം ദിനേശ് മണി, പി ആര് മുരളി എന്നിവര്ക്കായിരുന്നു അന്വേഷണ ചുമതല. പരാതിയില് സക്കീര് ഹുസൈന് പാര്ട്ടിക്ക് വിശദീകരണം നല്കുകയും ചെയ്തിരുന്നു. രണ്ട് വീടുകളാണ് തനിക്കുള്ളതെന്നും ഭാര്യയ്ക്ക് ഉയര്ന്ന ശമ്പളമുള്ളതുകൊണ്ട് നികുതി ഒഴിവാക്കാനാണ് ലോണെടുത്ത് രണ്ടാമത്തെ വീട് വാങ്ങിയത് എന്നുമാണ് സക്കീര് ഹുസൈന് പാര്ട്ടിക്ക് നല്കിയ വിശദീകരണം.
