ദില്ലി: പ്രമുഖ ഓണ്ലൈന് അടിവസ്ത്ര വ്യാപാര സൈറ്റായ സിവാമേയില് നിന്ന് ഏകദേശം 1.5 ദശലക്ഷം സ്ത്രീകളുടെ സ്വകാര്യ വിവരങ്ങള് ചോര്ന്നതായി റിപ്പോര്ട്ട്. വസ്ത്രങ്ങള് വാങ്ങുന്നതിന്റെ ഭാഗമായി ഉപഭോക്താക്കളായ സ്ത്രീകള് സിവാമേയില് നല്കിയിരുന്ന സ്വകാര്യ വിവരങ്ങളാണ് ചോര്ന്നത് എന്നാണ് വിവരം. ഇത് ഡാര്ക്ക് വെബില് വില്പ്പനയ്ക്ക് വച്ചിരിക്കുകയാണ്. ഉപഭോക്താക്കള് നല്കിയ പേര്, ഇമെയില്, ഫോണ് നമ്പര്, മേല്വിലാസം, മെഷര്മെന്റ് വിശദാശങ്ങള് എന്നിവയുള്പ്പെടെയുള്ള വിവരങ്ങള് നിലവില് ചോര്ന്നിരിക്കുന്നത് എന്നാണ് വിവരം.
500 ഡോളര് ക്രിപ്റ്റോകറന്സി നല്കിയാല് സിവാമേയില് നിന്ന് വസ്ത്രങ്ങള് വാങ്ങുന്നവരുടെ പൂര്ണ്ണ വിവരങ്ങള് നല്കാമെന്ന് വാഗ്ദാനത്തോടെ 15000 ലധികം സ്ത്രീകളുടെ സ്വകാര്യ ഡാറ്റകള് സാമ്പിളായി പങ്കു വെച്ചിട്ടുണ്ടെന്നാണ് വിവരം. ഈ സാമ്പിള്ഡാറ്റ കാണിച്ചാണ് വിലപേശല് നടത്തുന്നത്. സാമ്പിള് ഡേറ്റയിലെ സ്ത്രീകളുടെ വിവരങ്ങള് അന്വേഷിച്ച് പോയപ്പോഴാണ് അവരൊക്കെ സിവാമേയില് നിന്ന് വസ്ത്രങ്ങള് വാങ്ങിയവരാണെന്ന് വ്യക്തമായതായി വാര്ത്തകള് റിപ്പോര്ട്ട് ചെയ്ത ടെക് സൈറ്റുകള് പറയുന്നു.
