തിരുവനന്തപുരം: പരുമാതുറയിലെ 17കാരനായ ഇര്‍ഫാന്റെ മരണവുമായി ബന്ധപ്പെട്ട് സൃഹൃത്തിനെ പോലീസ് ചോദ്യം ചെയ്യുന്നു. വീട്ടില്‍ നിന്ന് വിളിച്ചു കൊണ്ടുപോയ സുഹൃത്തിനെയാണ് ചോദ്യം ചെയ്യുന്നത്. ഫൈസല്‍ എന്നയാളെയാണ് കസ്റ്റഡിയിലെടുത്തിരിക്കുന്നത്. ഇര്‍ഫാനാണ് തന്നെ വിളിച്ചുവരുത്തിയതെന്നും ഷെയ്ക്ക് കുടിക്കാനാണ് തങ്ങള്‍ പോയതെന്നുമാണ് ഫൈസലിന്റെ മൊഴി. ഫൈസലിനെ വിശദമായി ചോദ്യം ചെയ്തുവരികയാണ്. മകന്റെ മരണത്തില്‍ ദുരൂഹത ആരോപിച്ച് അമ്മ റജുല പരാതിപ്പെട്ടിരുന്നു.
അതേസമയം ഇന്നലെ വൈകുന്നേരം ആറു മണിയോടെ ഇര്‍ഫാനെ ഒരു സുഹൃത്ത് വീട്ടില്‍ നിന്ന് വിളിച്ചു കൊണ്ട് പോയതെന്ന് ഉമ്മ പറയുന്നു. ഒരു മണിക്കൂറിന് ശേഷം വൈകീട്ട് ഏഴുമണിയോടെ ഇര്‍ഫാനെ വീട്ടിനടുത്ത് ഉപേക്ഷിച്ച് ഇവര്‍ കടന്നുകളഞ്ഞെന്നും റജിലയുടെ പരാതിയില്‍ പറയുന്നു. ക്ഷീണിതനായി വീട്ടിലെത്തിയ ഇര്‍ഫാന്‍ ശാരീരിക അസ്വസ്ഥതകള്‍ പ്രകടിപ്പിക്കുകയായിരുന്നു. അമിതമായ അളവില്‍ ലഹരിമരുന്ന് ഉള്ളില്‍ച്ചെന്നതാണ് മരണത്തിലേക്ക് നയിച്ചതെന്നാണ് പോലീസിന്റെയും പ്രാഥമിക വിലയിരുത്തല്‍. ഇതുസംബന്ധിച്ച വിശദമായ അന്വേഷണം തുടരുകയാണ്.
