പത്തനംതിട്ട : സാമൂഹികപ്രവർത്തക ഡോ.എം.എസ് സുനിൽ സുരക്ഷിതമല്ലാത്ത സാഹചര്യങ്ങളിൽ കഴിയുന്ന ഭവനരഹിതർക്ക് പണിത് നൽകുന്ന 242-ാമത് സ്നേഹഭവനം മങ്ങാട്, മഠത്തിൽ മേലേതിൽ കുഞ്ഞുമോൾക്കും കുടുംബത്തിനുമായി വേൾഡ് മലയാളി കൗൺസിൽ ഡാലാസ് പ്രോവിൻസിന്റെ സഹായത്താൽ നിർമ്മിച്ചു നൽകി. വീടിന്റെ താക്കോൽ ദാനവും ഉദ്ഘാടനവും അഡ്വ.അടൂർ പ്രകാശ് എംപി നിർവഹിച്ചു. കുഞ്ഞുമോളും ഭർത്താവ് ജോണിയും രണ്ട് പെൺമക്കളും അടങ്ങിയ കുടുംബം താമസിച്ചിരുന്ന വീട് മഴയിൽ കുതിർന്ന് നിലംപൊത്തിയപ്പോൾ മറ്റ് മാർഗങ്ങളൊന്നുമില്ലാതെ സ്വന്തമായി ഒരു വീടു വയ്ക്കാൻ പറ്റാത്ത സാഹചര്യത്തിൽ ആയിരുന്നു.
ഇവരുടെ അവസ്ഥ മനസ്സിലാക്കിയ ടീച്ചർ ഇവർക്കായി രണ്ട് മുറികളും അടുക്കളയും ഹാളും ശുചിമുറിയും സിറ്റൗട്ടും അടങ്ങിയ ഒരു വീട് പണിത് നൽകുകയായിരുന്നു. ചടങ്ങിൽ വേൾഡ് മലയാളി കൗൺസിൽ ഗ്ലോബൽ പ്രസിഡന്റ് ഗോപാലപിള്ള, വാർഡ് മെമ്പർ സാം വാഴോട്., ഡോ.വിജയലക്ഷ്മി, കെ.പി കൃഷ്ണകുമാർ, കെ.പി ജയലാൽ, ബി.പത്മകുമാർ, പ്രസാദ്, ഏലിയാമ്മ ജോർജ്, ശോശാമ്മ കോശി എന്നിവർ പ്രസംഗിച്ചു.
