പത്തനംതിട്ട : വോട്ടർപട്ടികയിൽ പേര് ചേർക്കാൻ ജില്ലയിൽ ശനിയാഴ്ചവരെ ലഭിച്ചത് 2490 അപേക്ഷ. തിരുത്തലിന് 77 അപേക്ഷയും ലഭിച്ചു. തദ്ദേശസ്ഥാപനം മാറുന്നതിന് 217ഉം പട്ടികയിൽനിന്ന് ഒഴിവാകാൻ 190 അപേക്ഷയും ലഭിച്ചു. 2025 ജനുവരി ഒന്നിനോ മുമ്പോ 18 വയസ്സ് പൂർത്തിയായവർക്ക് ആഗസ്റ്റ് ഏഴുവരെ പേര് ചേർക്കാം. പുതുതായി പേര് ചേർക്കുന്നതിനും (ഫോറം നാല്), ഉൾക്കുറിപ്പുകൾ തിരുത്തുന്നതിനും (ഫോറം ആറ്), സ്ഥാനമാറ്റം വരുത്തുന്നതിനും (ഫോറം ഏഴ്) sec.kerala.gov.in വെബ്സൈറ്റിൽ ഓൺലൈനായി അപേക്ഷിക്കണം. അപേക്ഷിക്കുമ്പോൾ ഹിയറിങ്ങിനുള്ള കമ്പ്യൂട്ടർ ജനറേറ്റഡ് നോട്ടീസ് ലഭിക്കും. ഈ തീയതിയിൽ രേഖകൾ സഹിതം ഹിയറിങ്ങിന് നേരിട്ട് ഹാജരാകണം.
പേര് ഒഴിവാക്കുന്നത് സംബന്ധിച്ച ആക്ഷേപ (ഫോറം അഞ്ച്) ഓൺലൈനായി രജിസ്റ്റർ ചെയ്യുകയും പ്രിന്റ് ഔട്ടിൽ അപേക്ഷകനും വാർഡിലെ ഒരു വോട്ടറും ഒപ്പിട്ട് നേരിട്ടോ തപാലിലൂടെയോ ഇലക്ടറൽ രജിസ്ട്രേഷൻ ഓഫിസർക്ക് സമർപ്പിക്കണം. ഗ്രാമപഞ്ചായത്തുകളിലും നഗരസഭകളിലും അതത് സെക്രട്ടറിമാരും കോർപറേഷനുകളിൽ അഡീ.സെക്രട്ടറിയുമാണ് ഇലക്ടറൽ രജിസ്ട്രേഷൻ ഓഫിസർമാർ.
