കോന്നി : നിയോജക മണ്ഡലത്തിലെ മൂന്ന് കോളനികളുടെ വികസനത്തിനായി മൂന്നുകോടി രൂപ അനുവദിച്ചതായി കെ.യു ജനീഷ് കുമാര് എം.എല്.എ. അംബേദ്കര് ഗ്രാമം പദ്ധതി പ്രകാരമാണ് രണ്ടു പട്ടിക ജാതി കോളനികള്ക്കും ഒരു പട്ടിക വര്ഗ കോളനിയ്ക്കും ഓരോ കോടി വീതം അനുവദിച്ചിരിക്കുന്നത്. കലഞ്ഞൂര് പഞ്ചായത്തിലെ പാടം ഇരുട്ടുതറ ലക്ഷം വീട് കോളനി, സീതത്തോട് പഞ്ചായത്തിലെ ഇടുപ്പ് കല്ല് കൊച്ചാണ്ടി കോളനി, അരുവാപ്പുലം പഞ്ചായത്തിലെ കാട്ടത്തി കൊട്ടാമ്പാറ പട്ടികവര്ഗ കോളനി എന്നീ കോളനികള്ക്കാണ് തുക അനുവദിച്ചത്.
വികസനപരമായി പിന്നാക്കം നില്ക്കുന്ന കോളനികള്ക്ക് മുന്ഗണന നല്കിയാണ് സര്ക്കാര് പദ്ധതിയ്ക്ക് അനുമതി നല്കിയത്. കോളനികളില് റോഡ് നിര്മ്മാണം, വീട് പുനരുദ്ധരിക്കല്, കുടിവെള്ളം എത്തിക്കല്, സംരക്ഷണഭിത്തികളുടെ നിര്മ്മാണം തുടങ്ങിയ വികസന പ്രവര്ത്തനങ്ങള്ക്ക് തുക വിനിയോഗിക്കും. പട്ടിക ജാതി കോളനികളുടെ നിര്വഹണ ചുമതല ജില്ലാ പട്ടിക ജാതി വികസന ഓഫീസര്ക്കും പട്ടികവര്ഗ കോളനിയുടെ നിര്വഹണ ചുമതല ജില്ലാ പട്ടിക വര്ഗ വികസന ഓഫീസര്ക്കുമായിരിക്കും. ബന്ധപ്പെട്ട കോളനി യോഗങ്ങളും ഊരു കൂട്ടവും വിളിച്ചു ചേര്ത്ത് കോളനികളുടെ വികസന പ്രവര്ത്തികള് വേഗത്തില് ആരംഭിക്കുമെന്നും ഈ യോഗങ്ങളില് ഉന്നയിക്കുന്ന വികസന പ്രശ്നങ്ങള്ക്ക് മുന്ഗണന നല്കുമെന്നും എം.എല്.എ അറിയിച്ചു.
