പന്തളം : കാലാവസ്ഥ മാറിയതോടെ കുട്ടികളില് പനിയും വയറിളക്ക രോഗങ്ങളും വ്യാപകമാകുന്നു. സര്ക്കാര്-സ്വകാര്യ ആശുപത്രികളില് ചികിത്സ തേടിയെത്തുന്നവരില് പകുതിയില് കൂടുതലും കുട്ടികളാണ്. വൈറല്, തക്കാളിപ്പനി തുടങ്ങിയവ ബാധിച്ചാണ് കൂടുതല് കുട്ടികളും ചികിത്സ തേടുന്നത്. ചിലയിടങ്ങളില് ഡെങ്കിപ്പനിയും പടരുന്നുണ്ട്. അതേസമയം, കുടുംബാരോഗ്യ കേന്ദ്രങ്ങളില് ശിശുരോഗ വിദഗ്ധരുടെ കുറവ് സാധാരണക്കാരെ പ്രതിസന്ധിയിലാക്കുകയാണ്. ചികിത്സക്കായി സ്വകാര്യ ആശുപത്രികളെയും ക്ലിനിക്കുകളെയും ആശ്രയിക്കേണ്ട സാഹചര്യമാണ്.
പന്തളത്ത് കഴിഞ്ഞ ഒരാഴ്ചയായി പനി ബാധിതരുടെ എണ്ണം ക്രമാതീതമായി വര്ധിക്കുകയാണ്. പന്തളത്തെ കുടുംബാരോഗ്യ കേന്ദ്രത്തില് രണ്ടു ഡോക്ടര്മാരുടെ സേവനം മാത്രമാണ് നിലവിലുള്ളത്. ഉണ്ടായിരുന്നവര് സ്ഥലം മാറിപ്പോയതോടെ പുതിയ ഡോക്ടര്മാരെ നിയമിക്കണമെന്ന് ഡി.എം.ഒയ്ക്ക് പരാതി നല്കിയിട്ട് മാസങ്ങളായി. കുടുംബാരോഗ്യ കേന്ദ്രത്തില് രാവിലെ മുതല് അനുഭവപ്പെടുന്നത് രോഗികളുടെ നീണ്ട നിരയാണ്.