തിരുവനന്തപുരം : തലസ്ഥാന നഗരിയില് വീണ്ടും ഗുണ്ടാ വിളയാട്ടം. കോളേജ് വിദ്യാര്ത്ഥിയെ വെട്ടിക്കൊലപ്പെടുത്താന് ശ്രമിച്ച കേസില് മൂന്ന് പേരെ പോലീസ് പിടികൂടി. വട്ടിയൂര്ക്കാവ് ശാസ്താ നഗറില് കഴിഞ്ഞ ചൊവ്വാഴ്ച വൈകിട്ടോടെയാണ് സംഭവം. കുന്നുംപുറത്ത് വീട്ടില് രാഹുല് (31) ചെമ്പഴന്തി ഉദയഗിരി കൃഷ്ണ നിവാസില് അജിതന് (37) ചെമ്പഴന്തി കണ്ണങ്കര ഷൈലജ ഭവനില് ശ്രീജിത്ത് (34) എന്നിവരെയാണ് കഴക്കൂട്ടം പോലീസ് പിടികൂടിയത്.
ചെമ്പഴന്തി ഗുരുമന്ദിരത്തിന് സമീപമുള്ള കടയുടെ മുന്പില് ഇരിക്കുകയായിരുന്ന ചെമ്പഴന്തി സ്വദേശി അഭിമന്യുവിനെ ആയുധവുമായി എത്തിയ മൂന്നംഗ സംഘം ആക്രമിക്കുകയായിരുന്നു. അഭിമന്യുവിനെ കൂടാതെ ഇയാളുടെ സുഹൃത്തുക്കളെ ആക്രമിക്കുകയും ഇരുചക്ര വാഹനത്തിന് കേടുപാടുകള് വരുത്തുകയും ചെയ്തു. ചെമ്പഴന്തി കോളേജില് രണ്ടാം വര്ഷ വിദ്യാര്ത്ഥിയായ അഭിമന്യു ക്ലാസ്സ് കഴിഞ്ഞ് തിരിച്ചെത്തിയതായിരുന്നു. ചെമ്പഴന്തിയിലെ ഒരു കടയ്ക്ക് മുന്നില് നില്ക്കുകയായിരുന്ന അഭിമന്യുവിനോട് അവിടെയെത്തിയ സംഘം വീട്ടില് പോകാന് ആവശ്യപ്പെട്ടു. എന്നാല് അഭിമന്യു ഇത് അനുസരിച്ചില്ല. ഇതിലുള്ള വിരോധമാണ് ആക്രമണത്തിന് കാരണം.