തൃപ്പൂണിത്തുറ: ഹിൽപാലസ് മ്യൂസിയം ഹരിത ടൂറിസം കേന്ദ്രമായി പ്രഖ്യാപിക്കുന്നതിന്റെ ഭാഗമായി മാസ് ക്ലീനിംഗ് ഡ്രൈവ് നടത്തി. തൃപ്പൂണിത്തുറ നഗരസഭയുടെ നേതൃത്വത്തിൽ ഹരിതകേരളം മിഷൻ്റെ സഹകരണത്തോടെയാണ് ക്ലീനിംഗ് ഡ്രൈവ് സംഘടിപ്പിച്ചത്. ജില്ലാ കളക്ടർ എൻ എസ് കെ ഉമേഷ് സ്ഥലം സന്ദർശിക്കുകയും, എൻഎസ്എസ് വോളണ്ടിയേഴ്സിനെയും, നഗരസഭയെയും അഭിനന്ദിക്കുകയും ചെയ്തു. തൃപ്പൂണിത്തുറ നഗരസഭ ചെയർപേഴ്സൺ രമ സന്തോഷ് ക്ലീനിംഗ് ഡ്രൈവ് ഉദ്ഘാടനം ചെയ്തു.
നഗരസഭ ഹെൽത്ത് വിഭാഗവും, മ്യൂസിയം ജീവനക്കാരും വിവിധ കോളേജുകളായ സെൻറ് തോമസ് ആർട്സ് ആൻഡ് സയൻസ് കോളേജ് പുത്തൻകുരിശ്, രാജഗിരി കോളേജ് ഓഫ് മാനേജ്മെൻറ് ആൻഡ് അപ്ലൈഡ് സയൻസ്, കൊച്ചിൻ ആർട്സ് ആൻഡ് സയൻസ് കോളേജ്, എസ്. എച്ച് തേവര കോളേജ് എന്നീ കോളേജുകളുടെ എൻഎസ്എസ് വോളണ്ടിയേഴ്സ് ഉൾപ്പെടുന്ന 80 ൽ അധികം വിദ്യാർത്ഥികൾ ചേർന്നാണ് ക്ലീനിംഗ് ഡ്രൈവ് നടത്തിയത്.
തൃപ്പൂണിത്തുറ നഗരസഭ വൈസ് ചെയർമാൻ കെ കെ പ്രദീപ് കുമാർ ചടങ്ങിൽ അധ്യക്ഷനായി. ഹിൽപാലസ് മ്യൂസിയം സീനിയർ സൂപ്രണ്ട് പി അനിൽകുമാർ പി മാലിന്യമുക്ത സന്ദേശം ഉൾക്കൊള്ളിച്ചു കൊണ്ടുള്ള പ്രതിജ്ഞ ചൊല്ലിക്കൊടുത്തു. ആരോഗ്യ സ്റ്റാൻഡിംഗ് കമ്മിറ്റി ചെയർമാൻ സി എ ബെന്നി, നഗരസഭാ സെക്രട്ടറി പി കെ സുഭാഷ്, ക്ലീൻ സിറ്റി മാനേജർ സഞ്ജീവ് കുമാർ, സീനിയർ ഹെൽത്ത് ഇൻസ്പെക്ടർ ഇന്ദു സി നായർ, ഹരിത കേരളം മിഷൻ റിസോഴ്സ് പേഴ്സൺ റ്റി എസ് ദീപു, ജോയ് ജെഫിൻ എന്നിവർ പരിപാടിയിൽ പങ്കെടുത്തു.
