കൊച്ചി: കളമശേരി എസ്സിഎംഎസ് കോളജിനു മുന്നിൽ കാർ യുടേൺ എടുക്കുന്നതിനിടെ ബൈക്കിലിടിച്ച് വിദ്യാർഥി മരിച്ചു. എസ്സിഎംഎസ് കോളജിലെ ബിബിഎ രണ്ടാം വർഷ വിദ്യാർഥി സോൻസ് ആന്റണി സജി (19) ആണ് മരിച്ചത്. പത്തനംതിട്ട നന്നുവക്കാട് തെള്ളകം പുതുപ്പറമ്പിൽ പി.എ. സജിമോന്റെയും (കുട്ടപ്പായി) പി.ജെ.ഷീജയുടെയും മകനാണ് സോൻസ് ആന്റണി സജി.
ആലുവ ഭാഗത്തുനിന്നു വരികയായിരുന്ന കാർ ഇടിച്ചതിനെ തുടര്‍ന്ന് സോൻസ് ആന്റണി പാലത്തിന് അടിയിലേക്കു തെറിച്ചു വീഴുകയായിരുന്നു. കോളജിൽ ഓണാഘോഷ പരിപാടികൾ നടക്കുന്നതിനിടെയായിരുന്നു അപകടം. കേരളാ വ്യാപാരി വ്യവസായി ഏകോപന സമിതി പത്തനംതിട്ട മുനിസിപ്പല്‍ യൂണിറ്റ് എക്സിക്യുട്ടീവ്‌ അംഗവും കുമ്പഴയിലെ സെന്റ്‌ മേരീസ് ഓട്ടോ പാര്‍ട്സ് എന്ന സ്ഥാപനത്തിന്റെ ഉടമയുമാണ് പിതാവ് സജി. റെബേക്ക ഗ്രേസി സജി, ഹന്നാ മേരി സജി എന്നിവര്‍ സഹോദരിമാരാണ്.
