തിരുവനന്തപുരം: തിരുവനന്തപുരത്ത് പത്ത് വയസുകാരിയെ പീഡിപ്പിച്ച പ്രതിക്ക് അഞ്ച് വര്ഷം കഠിന തടവ്. അടിമലത്തുറ ഫാത്തിമമാതാ പള്ളിക്ക് സമീപം പുറമ്പോക്ക് പുരയിടത്തില് ക്രിസ്റ്റഫര് (58)നെ അഞ്ച് വര്ഷം കഠിന തടവിനും 25,000 രൂപ പിഴയും തിരുവനന്തപുരം പ്രത്യേക അതിവേഗ കോടതി ശിക്ഷിച്ചു. പിഴ അടച്ചില്ലെങ്കില് മൂന്ന് മാസം കൂടുതല് ശിക്ഷ അനുഭവിക്കണമെന്ന് ജഡ്ജി ആജ് സുദര്ശന് ഉത്തരവില് പറയുന്നു. 2020 നവംബര് നാലിന് ഉച്ചയോടെയാണ് കേസിനാസ്പദമായ സംഭവം നടന്നത്.
അച്ഛന്റെ കൂട്ടുകാരനാണ് താനെന്ന് പരിചയപ്പെടുത്തി കുട്ടികളെ പ്രതിയുടെ വീട്ടിലേക്ക് എത്തിക്കുകയായിരുന്നു. അനിയത്തിയെ ഒരു മുറിയിലിരുത്തിയതിന് ശേഷം ഇരയെ മറ്റൊരു മുറിയില് കൊണ്ട് പോയാണ് പീഡിപ്പിച്ചത്. കുട്ടി കരഞ്ഞപ്പോള് പ്രതി കുട്ടിക്ക് പൈസ കൊടുത്തിട്ട് മുട്ടായി വാങ്ങി തിരിച്ച് വരാന് പറഞ്ഞു. ഇത് പുറത്ത് ആരോടും പറയരുതെന്നും പറഞ്ഞു. വെളിയില് ഇറങ്ങിയ കുട്ടി അനിയത്തിയേയും കൂട്ടി വീട്ടില് ഓടി പോയി അമ്മയോട് വിവരം പറഞ്ഞു. വീട്ടുകാര് ഉടനെ പ്രതിയെ അന്വേഷിച്ച് വീട്ടിലെത്തിയപ്പോള് പ്രതി വീടിന്റെ വാതില് അടച്ചു. തുടര്ന്ന് വിഴിഞ്ഞം പോലീസില് പരാതി നല്കുകയായിരുന്നു.
