കോന്നി : ഇളകൊള്ളൂരില് കാട്ടുപന്നി കടയിലേക്ക് ഓടിക്കയറി. കടയിലുണ്ടായിരുന്ന അലമാര അടക്കം കാട്ടുപന്നി ഇടിച്ചു തകര്ത്തു. രാവിലെ ഒന്പത് മണിയോടെ ആയിരുന്നു സംഭവം നടന്നത്. ഇളകൊള്ളൂര് തോട്ടുവേലില് വീട്ടില് ശോഭനയുടെ കടയിലേക്കാണ് കാട്ടുപന്നി ഓടിക്കയറിയത്. കടയ്ക്കുള്ളിലെ അലമാരയുടെ ചില്ലുകളും അലമാരയുടെ കാലും കാട്ടുപന്നി ഇടിച്ചു തകര്ത്തു. പന്നി കടയ്ക്കുള്ളിലേക്ക് പാഞ്ഞ് കയറുന്നത് കണ്ട് സമീപവാസിയായ സ്ത്രീ ഒച്ചവെച്ചതിനെ തുടര്ന്ന് ശോഭന കടയിലെ മുറിക്കുള്ളിലേക്ക് ഓടി കയറിയതിനാല് പരിക്ക് ഏല്ക്കാതെ രക്ഷപെടുകയായിരുന്നു. കടയിലെ സാധനങ്ങള് തകര്ത്ത ശേഷം പന്നി ഇവരുടെ പറമ്പിലേക്ക് ഓടിമറയുകയും ചെയ്തു.
കഴിഞ്ഞ കുറച്ചു കാലങ്ങളായി പ്രദേശത്ത് കാട്ടുപന്നി ശല്യം രൂക്ഷമായി തുടരുകയാണ്. പകല് പോലും കാട്ടുപന്നികള് കൂട്ടമായി പ്രദേശത്ത് അലഞ്ഞ് തിരിയുന്നതും പതിവാണ്. കഴിഞ്ഞ ദിവസവും പന്നികള് കൂട്ടമായി എത്തിയിരുന്നതായി നാട്ടുകാര് പറയുന്നു. സമീപ പ്രദേശങ്ങളില് കാട് കയറി കിടക്കുന്ന സ്വകാര്യ വ്യക്തികളുടെ ഭൂമികള് കാട്ടുപന്നിക്ക് വളരുവാന് ഇടം ഒരുക്കുന്നുണ്ട്. എന്നാല് ഇതിനെതിരെ പ്രമാടം ഗ്രാമപഞ്ചായത്തും നടപടികള് സ്വീകരിക്കുന്നില്ല.
