മല്ലപ്പള്ളി : മല്ലപ്പള്ളി വായ്പൂരില് മണിമലയാറ്റില് കുളിക്കാനിറങ്ങിയ യുവാവ് മുങ്ങി മരിച്ചു. കൊട്ടാരക്കര സ്വദേശി മനോജ് (38) ആണ് മരണപ്പെട്ടത്. കുളിക്കാന് ഇറങ്ങുന്നതിനിടെ കാല് വാഴ്ത്തി നദിയിലേക്ക് വീഴുകയായിരുന്നു. വിവരമറിഞ്ഞ് സ്ഥലത്തെത്തിയ റാന്നി ഫയര് ഫോഴ്സ് സ്റ്റേഷന് ഓഫീസര് എ.ഷാജഹാന്റെ നേതൃത്വത്തില് ഉള്ള സംഘവും നാട്ടുകാരും ചേര്ന്ന് നടത്തിയ തിരച്ചിലിന് ഒടുവിൽ മൃതദേഹം കണ്ടെത്തുകയായിരുന്നു.
വായ്പൂരുള്ള തടി മില്ലില് ജോലി ചെയ്തു വരികയായിരുന്നു മനോജ്. മണിമലയാറ്റില് ജലനിരപ്പ് കുറവായിരുന്നു എങ്കിലും മനോജ് വീണ ഭാഗം താഴ്ച്ചയുള്ളതും ചെളി നിറഞ്ഞതുമായ പ്രദേശമായിരുന്നു. വീഴച്ചയില് മനോജ് ചെളിയില് പുതഞ്ഞു പോയതാണ് അപകടത്തിന് കാരണം എന്നാണ് നിഗമനം. പത്തനംതിട്ടയില് നിന്നും സ്കൂബ ടീം സ്ഥലത്തേക്ക് പുറപ്പെട്ടു എങ്കിലും ഇതിന് മുൻപ് തന്നെ മൃതദേഹം പുറത്തെടുത്തിരുന്നു.
