പത്തനംതിട്ട: അന്യസംസ്ഥാന തൊഴിലാളികൾ വാഹനത്തിൽ നിന്നും വലിച്ചെറിഞ്ഞ മാലിന്യക്കെട്ട് വീണ് യുവതിക്ക് പരിക്ക്. പ്രക്കാനം തൊട്ടുപുറത്ത് ഇന്ന് രാവിലെ എട്ടരയോടെയാണ് സംഭവം. സ്കൂട്ടറില് യാത്ര ചെയ്തിരുന്ന പ്രദേശവാസിയായ റിൻ്റു ബെന്നിക്കാണ് വെസ്റ്റ് ബാഗ് കൊണ്ടുള്ള ഏറ് കിട്ടിയത്. നെഞ്ചില് ഏറുകൊണ്ട ഇവര്ക്ക് ശ്വാസതടസ്സവും ദേഹാസ്വാസ്ഥ്യവും അനുഭവപ്പെട്ടു.
സംഭവം കണ്ട് ഓടിക്കൂടിയ നാട്ടുകാർ പിക്കപ്പ് വാഹനം തടഞ്ഞ് ഇലവുംതിട്ട പോലീസിനെ വിവരമറിയിച്ചു. തുടർന്ന് സ്ഥലത്തെത്തിയ പോലീസ് വാഹനം കസ്റ്റഡിയിലെടുത്തു. തൊട്ടുപുറം പ്രദേശത്ത് കക്കൂസ് മാലിന്യം ഉള്പ്പെടെ തള്ളുന്നത് നിത്യ സംഭവമാണെന്നും സി സി ടി വി ഉള്ള വീടുകളിൽ ഒരു ക്യാമറ റോഡിലേക്ക് തിരിച്ച് വെച്ചാൽ ഇത്തരക്കാരെ പിടികൂടാൻ സഹായമാകുമെന്നും വാർഡ് മെമ്പർ ശ്രീകുമാർ ചെന്നീർക്കര പറഞ്ഞു.
