ചെങ്ങന്നൂർ: അബുദാബിയിലെ വീട്ടിലുണ്ടായ തീപിടുത്തത്തിൽ ഭാര്യയെ രക്ഷിക്കാൻ ശ്രമിക്കുന്നതിനിടയിൽ ഗുരുതരമായി പൊള്ളലേറ്റ യുവാവ് മരിച്ചു. താമസ സ്ഥലത്തുണ്ടായ അഗ്നിബാധയിൽ ഗുരുതരമായി പൊള്ളലേറ്റ ചെങ്ങന്നൂർ പുത്തൻകാവ് ഐരൂക്കുഴിയിൽ വിട്ടിൽ എ.ജി.നൈനാന്റെ മകൻ അനിൽ നൈനാൻ (32) ആണ് മരിച്ചത്.
അബുദാബി മഫ്റഖ് ആശുപത്രിയിൽ ചികിത്സയിലായിരുന്നു. 80 ശതമാനത്തോളം പൊള്ളലേറ്റ നിലയിലാണ് ഇദ്ദേഹത്തെ ആശുപത്രിയിൽ പ്രവേശിപ്പിച്ചിരുന്നത്. ശനിയാഴ്ച്ച വൈകുന്നേരത്തോടെ ആരോഗ്യ നില വഷളാവുകയായിരുന്നു. ഗുരുതരമായ പൊള്ളലോടെ ആശുപത്രിയിൽ പ്രവേശിപ്പിക്കപ്പെട്ട ഭാര്യ മീനു ഇപ്പോഴും ചികിത്സയിലാണ്. മകൻ ഏഥനും അപകടനില തരണം ചെയ്തിട്ടുണ്ട്. നിയമ നടപടികൾക്ക് ശേഷം നാട്ടിലെത്തിക്കുന്ന മൃതദേഹം പുത്തൻകാവ് മതിലകം മാർത്തോമ്മാ പള്ളി സെമിത്തേരിയിൽ സംസ്കരിക്കും.