പാലാ : കോട്ടയം പാലാ രാമപുരം ജംഗ്ഷന് സമീപം കെഎസ്ആർടിസി ബസും നാഷണൽ പെർമിറ്റ് ലോറിയും വെണ്ണാട് ബസും തമ്മിൽ കൂട്ടിയിടിച്ച് അപകടം ഉണ്ടായി . അപകടത്തിൽ ഒൻപത് പേർക്ക് പരിക്കേറ്റു. ഇന്ന് വൈകിട്ട് നാല് മണിയോടെയാണ് നാടിനെ നടുക്കിയ അപകടം ഉണ്ടായത്. ബസ് യാത്രക്കാരായ ഏഴ് പേർക്കും രണ്ട് വാഹനങ്ങളിലെയും ഡ്രൈവർമാർക്കുമാണ് പരിക്കേറ്റത്. ഇവരെ ഉടൻ തന്നെ പാലായിലെയും ചേപ്പുകൂലയിലെയും വിവിധ ആശുപത്രികളിലേക്ക് മാറ്റി. അപകടത്തിൽ രണ്ട് വാഹനങ്ങളിലെയും ഡ്രൈവർമാരുടെ പരിക്ക് ഗുരുതരമാണ്.
കെഎസ്ആർടിസി ഡ്രൈവറുടെ കാലിന് ഒടിവുണ്ട്. മറ്റ് യാത്രക്കാരുടെ പരിക്ക് നിസ്സാരമാണെന്നാണ് റിപ്പോർട്ടുകൾ. അപകടത്തെ തുടർന്ന് തൊടുപുഴ-രാമപുരം-പാലാ റൂട്ടിൽ ഒരു മണിക്കൂറോളം ഗതാഗതം പൂർണ്ണമായും തടസ്സപ്പെട്ടു. റോഡിൽ കിടന്ന വാഹനങ്ങൾ നീക്കം ചെയ്യാനുള്ള നടപടികൾ വൈകിയതാണ് ഗതാഗതക്കുരുക്കിന് കാരണമായത്. വാഹനങ്ങളുടെ അമിതവേഗതയാണ് അപകടത്തിന് കാരണമായതെന്നാണ് പൊലീസിന്റെ പ്രാഥമിക നിഗമനം. സംഭവത്തിൽ രാമപുരം പൊലീസ് മേൽനടപടികൾ സ്വീകരിച്ചു.
