പാമ്പാടി: നിയന്ത്രണം വിട്ടെത്തിയ കാർ ദമ്പതികൾ സഞ്ചരിച്ച ബൈക്ക് ഇടിച്ചു തെറിപ്പിച്ചു. ഗുരുതര പരുക്കേറ്റ ബൈക്ക് യാത്രക്കാരായ കോത്തല വെള്ളാപ്പള്ളിൽ ജോമോൻ, ഭാര്യ നിവ്യ, മകൻ നിജോ എന്നിവരെ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ഇന്നലെ രാത്രി 7.15ന് ദേശീയപാതയിൽ ആലാമ്പള്ളി ജംക്ഷനും ഗവ.ആശുപത്രിപടി ജംക്ഷനും മധ്യേയുള്ള വളവിലായിരുന്നു അപകടം.
പാമ്പാടിയിലേക്കു വന്ന ബൈക്ക് യാത്രക്കാരെ എരുമേലി ഭാഗത്തേക്കു പോവുകയായിരുന്ന കാറാണ് ഇടിച്ചു തെറിപ്പിച്ചത്. കാർ യാത്രക്കാർ അമിതവേഗത്തിലാണ് വന്നതെന്നു നാട്ടുകാർ ആരോപിച്ചു. ദിശ തെറ്റിച്ചു കയറിയാണ് ബൈക്കിൽ ഇടിച്ചത്. ദേശീയപാതയിലേക്കു തെറിച്ചു വീണ ദമ്പതികളെയും മകനെയും നാട്ടുകാർ ഉടൻ ഗവ. താലൂക്ക് ആശുപത്രിയിലെത്തിച്ചു പ്രഥമ ശുശ്രൂഷ നൽകി.
