കൊച്ചി: നടിയെ ആക്രമിച്ച കേസ് സിബിഐ സ്പെഷ്യല് കോടതി മൂന്നില് നിന്നും മാറ്റി. ജില്ലാ പ്രിന്സിപ്പല് സെഷന്സ് കോടതിയിലേക്കാണ് കേസ് മാറ്റിയത്. കേസ് പരിഗണിച്ചിരുന്ന വിചാരണക്കോടതി ജഡ്ജി ഹണി എം വര്ഗീസാണ് ഈ കോടതിയിലെ പുതിയ ജഡ്ജി. ഇതോടെ കേസ് പരിഗണിക്കുന്ന ജഡ്ജിന്റെ കാര്യത്തില് മാറ്റമുണ്ടാവില്ല എന്ന അവസ്ഥയാണുണ്ടായിരിക്കുന്നത്. നേരത്തെ ഹണി എം വര്ഗീസിനെ സിബിഐ സ്പെഷ്യല് കോടതി മൂന്നില് നിന്ന് മാറ്റിയിരുന്നു. ജഡ്ജ് കെകെ ബാലകൃഷ്ണനാണ് പുതിയ ജഡ്ജി. കേസ് പരിഗണിക്കുന്നതില് നിന്ന് ഹണി എം വര്ഗീസിനെ മാറ്റണമെന്നാവശ്യപ്പെട്ട് അതിജീവിത ഹൈക്കോടതി സമീപിച്ചിട്ടുണ്ട്. അതിനിടയിലാണ് ഹണി എം വര്ഗീസിന്റെ കോടതിയിലേക്ക് തന്നെ കേസ് മാറ്റിയിരിക്കുന്നത്.
ഹണി എം വര്ഗീസ് വിചാരണ നടത്തിയാല് നീതി ലഭിക്കില്ല, കേസ് സിബിഐ കോടതിയിലോ മറ്റേതെങ്കിലും വനിതാ ജഡ്ജിയെ കൊണ്ടോ വിചാരണ നടത്തണം. വിചാരണ പുതിയ ജഡ്ജി കേള്ക്കണം, അത് പുരുഷനായാലും കുഴപ്പമില്ലെന്ന് അതിജീവിത അപേക്ഷയില് ആവശ്യപ്പെടുന്നു. സിബിഐ പ്രത്യേക കോടതി ജഡ്ജി ഹണി എം വര്ഗീസിന് പകരം പുതിയ ജഡ്ജിയെ നിയമിച്ച സാഹചര്യത്തില് കൂടിയാണ് അപേക്ഷ. ജഡ്ജിയെ മാറ്റുന്നതിനൊപ്പം കേസും മാറ്റരുതെന്നാണ് ആവശ്യം. കേസില് വിചാരണ തീരുന്നത് വരെ ജഡ്ജ് ഹണി എം വര്ഗീസിന് സിബിഐ കോടതിയില് തുടരാമെന്ന മുന് ഉത്തരവ് ഉണ്ടായിരുന്നു.
