കൊച്ചി: നടിയെ ആക്രമിച്ച കേസില് മുന് ഡിജിപി ആര് ശ്രീലേഖക്കെതിരെ കോടതിയലക്ഷ്യ നടപടിക്ക് അനുമതി തേടി ഹര്ജി. ഷേര്ലി എന്ന വിദ്യാര്ത്ഥിനിയാണ് അഡ്വക്കേറ്റ് ജനറലിനു ഹര്ജി നല്കിയത്. നടിയെ ആക്രമിച്ച കേസില് ദിലീപിന് അനുകൂലമായി നടത്തിയ പ്രസ്താവനക്കെതിരെയാണ് ഹര്ജി സമര്പ്പിച്ചത്. ദിലീപ് കേസില് പ്രതിയല്ലന്നായിരുന്നു ശ്രീലേഖ യൂട്യൂബ് ചാനലിലൂടെ പറഞ്ഞത്.
നടിയെ ആക്രമിച്ച കേസ് നിര്ണ്ണായക ഘട്ടത്തില് എത്തി നില്ക്കെയാണ് ആര് ശ്രീലേഖ ദിലീപിന് ക്ളീന് ചിറ്റ് നല്കി പോലീസിനെ പൂര്ണ്ണമായും തള്ളുകയായിരുന്നു. ദിലീപിനെതിരെ പോലീസ് കണ്ടെത്തിയ തെളിവുകളുടെ വിശ്വാസ്യത തന്നെ മുന് ജയില് മേധാവി ചോദ്യം ചെയ്തു. ദിലീപും പള്സര് സുനിയും തമ്മിലുള്ള ഫോട്ടോ വ്യാജമാണെന്നും ഇരുവരും ഒരേ ടവര് ലോക്കേഷനില് വന്നിരുന്നുവെന്നത് വിശ്വാസ്യ യോഗ്യമല്ലെന്നും ശ്രീലേഖ പറഞ്ഞു.
ദിലീപിന്റെ അറസ്റ്റ് മാധ്യമ സമ്മര്ദ്ദത്തിന്റെ ഫലമാണെന്ന് പറഞ്ഞാണ് പോലീസ് നടപടിയെ ചോദ്യം ചെയ്യുന്നത്. അടുത്തിടെ മാത്രം സര്വീസില് വിരമിച്ച ഉദ്യോഗസ്ഥയാണ് ശ്രീലേഖ. നിര്ണായകമായ കേസില് ഇപ്പോള് ഇങ്ങിനെ സ്വന്തം യു ട്യൂബ് ചാനല് വഴി ശ്രീലേഖ പറയാന് കാരണം വ്യക്തമല്ല. ദിലീപിന്റെ അഭിഭാഷകര് വീഡിയോ പോലീസിനെതിരെ തെളിവായി കോടതിയില് ഹാജരാക്കാന് സാധ്യത ഏറെയാണ്. ശ്രീലേഖയെ വിസ്തരിക്കണമെന്ന് വരെ പ്രതിഭാഗം ആവശ്യപ്പെട്ടേക്കുമെന്നാണ് സൂചന.
