കൊച്ചി : നടിയെ തട്ടിക്കൊണ്ടു പോയി പീഡിപ്പിച്ചതിന്റെ ദൃശ്യങ്ങള് കോടതിയുടെ കസ്റ്റഡിയില് നിന്നു ചോര്ന്നതായി അന്വേഷണ സംഘം സ്ഥിരീകരിച്ചു. ദൃശ്യങ്ങളടങ്ങിയ പെന്ഡ്രൈവ് ആരോ പരിശോധിച്ചതായി അന്വേഷണ സംഘം ഇന്നലെ വിചാരണക്കോടതിയെ അറിയിച്ചു. വിശദമായ റിപ്പോര്ട്ട് മുദ്രവച്ച കവറില് കൈമാറാന് കോടതി നിര്ദേശിച്ചു. കേസില് തുടരന്വേഷണത്തിനു കോടതി അനുവദിച്ച സമയം 28 ന് അവസാനിച്ചതിനാല് 3 മാസത്തെ അധിക സമയം അന്വേഷണസംഘം ആവശ്യപ്പെട്ടു.
എന്നാല് അന്വേഷണ റിപ്പോര്ട്ടില് അതൃപ്തി രേഖപ്പെടുത്തിയ കോടതി, കൂടുതല് സമയം ആവശ്യപ്പെടുന്നതു ന്യായീകരിക്കാന് വേണ്ട വിവരങ്ങളും കണ്ടെത്തലുകളും അതിലില്ലെന്നു ചൂണ്ടിക്കാട്ടി. തുടര്ന്ന് 10 നു മുന്പു വിശദമായ റിപ്പോര്ട്ട് സമര്പ്പിക്കാന് ക്രൈംബ്രാഞ്ചിനു നിര്ദേശം നല്കി. തുടരന്വേഷണത്തിലെ കണ്ടെത്തലുകളെ കുറിച്ചു വിചാരണക്കോടതിയെ ബോധ്യപ്പെടുത്താതെ കൂടുതല് സമയം വേണമെന്ന ആവശ്യം പരിഗണിക്കാന് കഴിയില്ലെന്നാണു കോടതിയുടെ നിലപാട്.
