കൊച്ചി : താരസംഘടനയായ അമ്മ’യിൽ നിലവിൽ രൂപീകരിച്ച അഡ്ഹോക് കമ്മിറ്റിക്കെതിരെ കോടതിയിൽ നിന്ന് സ്റ്റേ ഓർഡർ നേടിയെടുത്ത വിവരം പങ്കുവച്ച് നടി ശ്വേതാ മേനോൻ. സംഘടനയെ പിൻവാതിലിലൂടെ ഹൈജാക്ക് ചെയ്യാൻ ശ്രമിക്കുന്നവർക്കെതിരെ രൂക്ഷമായ ഭാഷയിലാണ് ശ്വേത തന്റെ സോഷ്യൽ മീഡിയ കുറിപ്പിലൂടെ പ്രതികരിച്ചിരിക്കുന്നത്. പ്രതിസന്ധി ഘട്ടങ്ങളിൽ തനിക്ക് കരുത്തായി നിന്ന മമ്മൂട്ടിക്കും മോഹൻലാലിനും ശ്വേതാ മേനോൻ നന്ദി അറിയിക്കുകയും ചെയ്തു. ‘മായ ആഞ്ചലോ’ യുടെ പ്രശസ്തമായ വരികൾ കുറിച്ചുകൊണ്ടാണ് ശ്വേത തന്റെ നിലപാട് വ്യക്തമാക്കിയത്. സംഘടനയ്ക്കുള്ളിൽ വലിയ രീതിയിലുള്ള തർക്കങ്ങളും ആരോപണങ്ങളും ഉയർന്നപ്പോഴും മുതിർന്ന താരങ്ങളായ മമ്മൂട്ടിയും മോഹൻലാലും തനിക്ക് വലിയ പിന്തുണയാണ് നൽകിയതെന്ന് ശ്വേതാ മേനോൻ വെളിപ്പെടുത്തുന്നു.
‘ഓടിളക്കി വന്ന പത്തോ പതിനഞ്ചോ പേരല്ല അമ്മ എങ്ങനെ മുന്നോട്ട് പോകണം എന്ന് തീരുമാനിക്കേണ്ടത് മത്സരിച്ച് വിജയിച്ചവരാണ്’ എന്ന സ്റ്റേറ്റ്മെന്റ് പങ്കുവച്ചുകൊണ്ടായിരുന്നു ശ്വേതയുടെ കുറിപ്പ്. ‘‘നിങ്ങളുടെ വാക്കുകൾ കൊണ്ട് നിങ്ങളെന്നെ മുറിവേല്പിച്ചേക്കാം… എങ്കിലും, വായുവിനെപ്പോലെ ഞാൻ വീണ്ടും ഉയിർത്തെഴുന്നേൽക്കും” – മായ ആഞ്ചലോ. ‘എനിക്ക് തണലായി നിന്നതിന് മമ്മൂക്കയോടും ലാലേട്ടനോടും ഞാൻ നന്ദി പറയുന്നു. രാജിവയ്ക്കരുതെന്നും, എന്റെ നിലപാടിൽ ഉറച്ചുനിൽക്കണമെന്നും, പോരാടണമെന്നും അവർ എന്നോട് പറഞ്ഞു. എന്റെ കൂടെ നിൽക്കുകയും, ഈ പോരാട്ടം അർഹതപ്പെട്ടതാണെന്ന് വിശ്വസിക്കുകയും ചെയ്ത ‘അമ്മ’യിലെ എല്ലാ അംഗങ്ങൾക്കും ഞാൻ നന്ദി രേഖപ്പെടുത്തുന്നു’ ശ്വേതയുടെ കുറിപ്പ്.
