ജയ്പുര്‍ : രാജസ്ഥാനില്‍ കോവിഡ് വാക്‌സിന്‍ സ്വീകരിച്ചയാള്‍ അഞ്ചാം ദിവസം മരിച്ചു. വാക്‌സിന്‍ സ്വീകരിച്ച സുരേഷ് ചന്ദ്ര ശര്‍മയാണ് മരിച്ചത്. അസിസ്റ്റന്റ് അഡ്മിനിസ്‌ട്രേറ്റീവ് ഓഫീസറായി ജോലി ചെയ്യുകയാണ് സുരേഷ് ചന്ദ്ര. രാജസ്ഥാനിലെ ചിറ്റോര്‍ഗഢ് ജില്ലയിലാണ് ഇയാളുടെ താമസം.
അതേസമയം സുരേഷ് ചന്ദ്രയുടെ മരണം വാക്‌സിന്‍ കുത്തി വെച്ചതിന്റെ ഫലമായി സംഭവിച്ചതല്ലെന്ന് അധികൃതര്‍ വ്യക്തമാക്കി. ഇയാളുടെ വൃക്കയ്ക്ക് തകരാറുകള്‍ ഉണ്ട്. ഉയര്‍ന്ന രക്ത സമ്മര്‍ദ്ദമുണ്ടായതിന് പിന്നാലെ മസ്തിഷ്‌കത്തില്‍ രക്തസ്രാവമുണ്ടായതിനെ തുടര്‍ന്നാണ് സുരേഷ് ചന്ദ്രയുടെ മരണം. വാക്‌സിന്‍ കുത്തി വെയ്പ്പ് തുടങ്ങിയ ശേഷം സംസ്ഥാനത്ത് ഇതുവരെയായി 44 പേര്‍ക്ക് പാര്‍ശ്വഫലങ്ങള്‍ കണ്ടെത്തിയതായി റിപ്പോര്‍ട്ടുകളുണ്ടായിരുന്നു.
