കോന്നി: കോന്നി കല്ലേലി ഊരാളി അപ്പൂപ്പൻ കാവ്–അച്ചൻകോവിൽ വഴി തെങ്കാശി–രാജപാളയം വനപാത യാഥാർത്ഥ്യമാക്കണമെന്ന് അടൂര് എം.എൽ.എ അഡ്വ സി.വി. ശാന്തകുമാർ നിയമസഭയിൽ ആവശ്യപ്പെട്ടു. 2026–27 സാമ്പത്തിക വർഷത്തെ പുതുക്കിയ ബജറ്റിന്മേലുള്ള പൊതുചർച്ചയിൽ സംസാരിക്കവെയാണ് അദ്ദേഹം ഈ ആവശ്യം ഉന്നയിച്ചത്.ശബരിമല തീർഥാടനത്തിന്റെ പ്രാധാന്യം കണക്കിലെടുത്ത് അന്യസംസ്ഥാനങ്ങളിൽ നിന്ന് നിരവധി അയ്യപ്പഭക്തർ കടന്നുവരുന്ന പരമ്പരാഗത കാനനപാതയാണ് കോന്നി–കല്ലേലി ഊരാളി അപ്പൂപ്പൻ കാവ്–അച്ചൻകോവിൽ–തെങ്കാശി–രാജപാളയം തീർഥാടക പാതയെന്ന് അദ്ദേഹം ചൂണ്ടിക്കാട്ടി.
വർഷങ്ങളായി തീർഥാടകരും ഭക്തജനങ്ങളും ഉപയോഗിച്ചുവരുന്ന ഈ വനപാത സുരക്ഷിതവും സഞ്ചാരയോഗ്യവുമായി വികസിപ്പിക്കുന്നതിനുള്ള നടപടികൾ സർക്കാർ അടിയന്തരമായി സ്വീകരിക്കണമെന്നും അദ്ദേഹം ആവശ്യപ്പെട്ടു. കല്ലേലി ഊരാളി അപ്പൂപ്പൻ കാവ് പ്രസിഡന്റുകൂടിയായ അഡ്വ. സി.വി. ശാന്തകുമാർ, പുതുക്കിയ ബജറ്റിന്മേലുള്ള പൊതുചർച്ചയിൽ ഉന്നയിച്ച പ്രധാന ആവശ്യങ്ങളിലൊന്നായിരുന്നു ഈ വനപാതയുടെ വികസനം. ശബരിമലയിലേക്കുള്ള പരമ്പരാഗത തീർഥാടക പാതകളുടെ സംരക്ഷണത്തിനും തീർഥാടന ടൂറിസത്തിന്റെ വികസനത്തിനും ഈ പദ്ധതി സഹായകരമാകുമെന്നും അദ്ദേഹം അഭിപ്രായപ്പെട്ടു.
